Danmarkimi aappaluttumik nalunaarsorsimasumiissimaguit nammineq qinikkamik aninaveersaartariaqarputit
Københavnimit imaluunniit illoqarfiit pingaarnersaani kommunit allanit, Nordjyllandimit Esbjergimiilluunniit nunatsinnukaruit nammineq qinikkannik ulluni tallimani aninaveersaartariaqarputit.
Tamanna Naalakkersuisut saqqummiuteqammerpaat.
Ishøj
Brønderslev
Vallensbæk
Brøndby
Glostrup
Frederiksberg
Hvidovre
Albertslund
Herlev
Københavns
Fanø
Høje-Taastrup
Gladsaxe
Rødovre
Esbjerg
Fredericia
Ballerup
Hjørring
Rudersdal
Slagelse
Gentofte
Varde
Aalborg
Hørsholm
Roskilde
Allattorsimaffik ullormiit ullormut allanngorsinnaavoq.
Danmarkimi kommune aappaluttuusoq tassaavoq tunillatsittut amerlassusaat qaffasittoq. Taakkunanngaanniillu nunatsinnukartut tikinnerminniit ullut tallimat qaangiunnerini misissorteqqissapput. Aamma COVID-19-imik tunillatsissimannginnerup uppernarsarneqarnissaata tungaanut allanut qanillinaveersaaqqullugit aamma aaqqissuussinernut, inuit katersuuffigisaannut peqataanngilluinnaqquneqarput.
- Tamanna inatsisiliorsinnaanngilarput. Innuttaasut ataasiakkaat taanna akisussaaffigaat, nakorsaaneq, Henrik L. Hansen oqarpoq.
- Angalasut tamarmik mianersorluinnassapput.
Nittartakkami uani www.ssi.dk/covid19data kommunit sorliit aappaluttuunersut takusinnaavat.
Danmarkimi tunillaassuuttoqarnera siammariartortoq
Innersuussutit pineqarput. Taamaammat malittarisassat inatsisaanngillat. Taamaammat malittarisassat malinneqanngikkunik akiliisitsisoqassanngilaq.
Maannakkut innersuussuteqalerneranut Danmarkimi tunillaassuuttoqarnerata siaruariartulerneranik pissuteqarpoq.
Danmarkimi coronamik tunillatsissimasutut ulloq ataaseq kingulleq paasineqartut 454-iusut, Statens Serum Institutimit kisitsit takutippaat. Ippassaq tunillatsissimasutut paasineqartut aatsaat taama amerlatigipput: 453-it tunillatsissimasutut uppernarsarneqarput.
AAMMA ATUARUK Danmarkimi tunillatsissimasutut paasineqartut 453-iullutik aatsaat taama amerlatigisut
- Covid-19-ip nunarsuaq tamakkerlugu tunillaasuunnerani Danmarkimi tunillaassuuttoqarnerani immikkoortup aappassaa maanna ingerlaaleruttorpoq, nunatsinnilu tunillaassuuneq siulleq maannamut qaangersimavarput, peqqinnissamut naalakkersuisoq, Anna Wangenheim (D) oqarpoq.
- Nunatsinnut angalasunut nakkutiginninnikkut suliniutit iluatsilluarnerannik innuttaasullu tamarmik akisussaaffimmik annertuumik tigusillutik peqqinnissamut tunngatillugu innersuussutinik malinninnerannik tamanna pissuteqarpoq. Covid-19-ip tunillaassuuttoqarnera annikinnerpaaffissaatiinnassagutsigu tamatta akisussaaffimmik tiguseqqissaagut.
Nunatsinnut septembarip ulluisa 16-iata kingorna tikittut septembarip 21-anni misissorteqqissinnaapput.
Kommuninut aappaluttumik nalunaaqutsersimasunut angalasinnaavutit
Innersuussutit kommuninut aappaluttumik nalunaaqutsersimasunut angalasunut tunnganerupput. Kangerlussuarmukarnissamulli ingerlariaqqinnissamut Københavnip mittarfianukaqqaarnissaq pisaraiqarpoq. Kommunilu taanna aappaluttumik nalunaaqutsersimalluni.
Ulluni arlalinni kommunimi aappaluttumik nalunaaqutsersimasumiissimagaanni misissorteqqittoqaqqittariaqarpoq. Københavnimulli qimuttuitsunik ingerlaannarsimagaanni timmisartumullu ikinnginnermi unnukkut nuannattuniissimanngikkaanni ullut tallimat qaangiunneranni misissorteqqittoqartariaqanngitsoq, nakorsaanerup, Henrik L. Hansenip oqaatigaa.
AAMMA ATUARUK Tamaat isigalugu: Coronavirus pillugu killiffik
Timmisartumut ilaasut 800-it missaanniittut nunatsinnut sapaatip akunneranut tikissinnaapput - nakorsaanerullu oqarnera naapertorlugu ilaasut tamarmik misissortittalernavianngillat.
Nunatta aasaq ammaqqinneraniilli timmisartumut ilaasussat tamarmik tunillatsissimannginnermut uppernarsaateqartussaallutillu Immersuiffik-Sumut immersorsimasussaavaat. Taamaaliortoqaannassaarlu.
Innersuussutit nutaat tassaapput kommunimi aappaluttumik nalunaaqutsersimasumiissimagaanni tikikkaanni aninaveersaarnissaq ullullu tallimat qaangiunneranni misissorteqqinnissaq.
Aamma kommuninut aappaluttumik nalunaaqutsersimasunut angalanissaq inerteqqutaanngilaq.
- Mianersorilli nutaanullu malinnaallutik. Pissutsit ullormiit ullormut allanngoratarsinnaapput, Anna Wangenheim oqarpoq.
Nakorsaanerup oqarnera naapertorlugu nunatsinnut angalasussat pingasut coronamik tunillatsissimanertik pissutigalugu timmisartumut ilaaqqusaasimanngillat.
Nutarterneqarpoq....