Isumaqatigiissut naammagineqanngitsoq: - Atorfeqaannarnissaq kajuminnarunnaajallappoq
- Maannakkut pitsaanerusoqarnissaanik ilimagisaqarsinnaanngilanga.
Taama oqarpoq peqqissaasoq Navarana Helena Johansen, isumaqatigiissut nutaaq maanna suleqatinilu akuerisassartik itigartitsissutigisassartilluunniit pillugu.
Ukiumi ataatsimi peqqinnissaqarfimmi sulisut pillugit isumaqatiginninniarnerit inerneri pillugit allagartaq ataasinngornermi unnukkut suleqatinilu tiguaat.
Isumaqatiginninniarnerit siorna naammassineqartussatut naatsorsuutigineqaraluarput - qaammatilli 15-it sinnerlugit kinguaattoorfiusimapput.
Isumaqatigiissut nutaaq kiisami piareertoq nuannersutut pisariaqartinneqartutullu isikkoqarsinnaavoq, Navaranali taama isumaqanngilaq. Akerlinganilli inernerit pillugit allagartaq misissuataareerlugulu pakatsingaalerpoq.
- Isumaqatigiissut ataasinngornermi unnukkut mailikkut pivarput, tupaallaatigeqaaralu, KNR-imut oqarpoq.
Isumaqatigiissummi isornartorsiorneqarsinnaasorisani arlallit tikkuarpai. Assersuutigalugu akissarsiat qaffanneqarnissaat ukiumullu bonusisisarneq iluarinngilluinnarpai.
- Akissarsiat inuiaqatigiinni akit qaffakkiartornerannut malinnaasinnaanngillat - suut tamarmik qaffassimapput, akissarsialli qaffassimanngillat. Aqutsisullu ukiumoortumik bonusisisarunnaarsimapput, taanna tikkuaavoq.
Isumaqatigiissummillu naammaginninngitsuni kisiartaanngivippoq. KNR-ip peqqissaasut arlallit attaveqarfigai, ilaatigut Pipaluk Kleemann, ukiut tallimat matuma siorna peqqissaasutut naammassisoq.
- Tamanna kalaallit peqqinnissaqarfimmi sulisutut pisinnaatitaaffitsinnik ajornerulersitsivoq, ajoraluartumillu peqqissaasunut atorfinitsitaasunut, amigaatigilluinnakkatsinnut, ajornerulersitsivoq, taanna oqarpoq.
Maanna Tasiilami paarlattaasutut sulivoq, isumaqatigiissullu nutaaq pissutigalugu atorfininnissaminut qinnuteqarumanngilaq.
- Aap, atorfininnissaq kajuminnarunnaajallappoq. Sulinerusariaqarpugut akissarsiakinnerullutalu. Tamatuma saniatigut pisinnaatitaaffivut ikiliartuinnartut misigisimavugut. Tamanna kissaatiginngilarput, Pipaluk Kleemann oqarpoq.
Oqaluttaasarneq pillugu immikkoortoq misigissutsinik pilersitsisoq
Akissarsiat qaffanneqaqqatarnerata saniatigut isumaqatigiissummi nutaami immikkut ataaseq Navarana Helena Johansenimut Pipaluk Kleemannimullu sunniivoq:
Oqaluttaaneq.
Tamannami peqqinnissaqarfimmi sulisut kalaallisut oqaluttut arlallit suleqatiminnik kalaallisut oqalussinnaanngitsunik ulluinnarni suliaqarnerminni suliarisarpaat.
Tamanna ilaatigut Pipaluk Kleemannip siornatigut isornartorsiorsimavaa. Sulisut kalaallisut oqaasillit nanertuutigisaat, nammineq allallu isumaat malillugu, isiginiarneqarnissaat piumasarisimagaluarpaa.
Isumaqatigiissummili nutaami tamanna isiginiarneqanngilaq, tamannalu Pipaluk Kleemannip pakatsissutigaa:
- Oqaluttaasariaqartarutta soorunami akissarsisinneqartariaqarpugut, taanna oqarpoq.
Akerlinganik peqqinnissaqarfimmi sulisut "sulinerminni oqaatsit assigiinngitsut atorlugit oqaluttunik suleqateqartarnerat ikiuisarnerallu ulluinnarni suliassaannut ilaalluinnartoq", tamannalu "oqaatsit assigiinngitsut atorlugit suleqatigiinnermut pissusissamisoorlunilu pisariaqartutut" isigineqartoq, isumaqatigiissummi maanna saqqummiunneqartumi allassimavoq.
Allataq taanna inoqatinut attaveqaatini qisuariarfigineqangaatsiarpoq, aamma peqqissaasup Navarana Helena Johansenip misigissutsimigut killinneqaatigingaarpaa:
- Kalaallit peqqissaasut qanoq sulerulutsiginertik nilliaatigiuarsimavaat, tusaaneqarnerli ajorput. Maannalu siornatigut soqutigineqanngitsutut isigineqartoq piumasaqaatinngoriasaarpoq, taanna oqarpoq.
- Uannut nunasiaateqarnermut nutaamut ersiutaavoq - nunasiaateqarnerup kinguneri suli ersaripput, taanna oqarpoq.
Peqqinnissaqarfimmili sulisut avataaneersut kalaallisut oqalussinnaanngitsut pisariaqartippavut. Oqaluttaanissaq nutserisarnerlu peqqissaasutut suliassanut ilaaginnartariaqartutut isigineqassannginnerpat?
- Naamik, taama isumaqanngilanga. Aap, peqqinnissaqarfimmi sulisut pisariaqartippavut, aamma kalaallit oqaasiinik oqalussinnaanngitsut – aap, aamma kalaaleqarpoq kalaallisut oqalussinnaanngitsunik, taakkulu aamma pisariaqartippavut, Navarana Helen Johansen akivoq nangillunilu:
- Uagulli peqqissaasutut ilinniarsimasuusugut oqalutsitut ilinniagaqanngilagut.
Nammineq aalajangiisinnaasuuguni immikkoortoq oqaluttaanermut tunngasoq isumaqatigiissummi ilanngunneqanngilluinnassagaluarpoq.
- Peqqinnissaqarfimmi sulisut oqaluttaasarnissaat isumaqatigiissummi allassimanikuunngisaannarpoq, taamaattumik sooq maanna atuutsilersinneqariataassanersoq paasisinnaanngilara, taanna oqarpoq.
PPK akissuteqartoq
Isumaqatigiissutip allanngortinneqarnerata tamanut saqqummiunneqarnerata kingorna PPK-p (Peqqinnissaq Pillugu Kattuffiit) siulersuisui, Akileraartarnermut Aningaasaqarnermullu Naalakkersuisoqarfik peqatigalugu isumaqatigiissummik isumaqatiginninniartuusimasut, oqaluttaaneq pillugu immikkoortortaq pillugu akissuteqarput.
Sisamanngornermi taamaaliorput.
Tassani isumaqatigiissummi oqaluttaaneq pillugu ilanngussami Kalaallit Nunaanni Peqqinnissaqarfimmi "assigiinngitsunik suliaqartut kulturillu assigiinngitsut suleqatigiinnerisa tapersersornissaat" siunertaasoq allapput.
- Peqqinnissaqarfimmi sulisut oqalutsitut kiffartuussinissaannik piumasaqarnertut paasineqassanngilaq. Tamanna pingaarnertut suliassarinngilaat, aamma tamanna pillugu sulisinneqarneq ajorput ilinniartinneqarnikuunatillu, taakku allapput.
Aammattaaq oqaluttaanermi suliassanik inuussutissarsiutigalugu oqalutsinik suliaqartussanik qulakkeerinnitoqartariaqartoq, PPK allappoq.
- Oqaatsitigut ikiuineq suleqatigiinnermut ilaanera pillugu ilanngussami matumani oqaatsit assigiinngitsorpassuit atorlugit oqaluffiusumi sulinerput pineqarpoq, pissutsillu ilaanni oqaatsit assigiinngitsut atorlugit suleqatigiinnerup pisariaqartinneqartarnera aamma pineqarpoq, nangillutik allapput.
Oqaluttaaneq pillugu immikkoortoq nunasiaateqarnermik nutaamik ersersitsineranik pasilliutit — aamma Facebookimi siammarsimasut — PPK-p ilumuunnginnerarpai sakkortuumillu assortorlugit.
