Inuusuttuaqqanut pinerluuteqarsimasunut inissiivik nutaaq ammarneqassaaq
Inuusuttuaqqanut 15-it 18-illu akornanni ukiulinnut pinerluuteqarsimasunut pineqaatissinneqarsimasunullu inissiivissamik pilersitsisoqarnissaa politikkikkut qangali kissaatigineqarsimavoq, maannalu tassa piviusunngulerluni.
- Piffissami sivitsulersumi inuusuttuaqqanut pinerluuteqarsimasunut isumaginninnikkut perorsaanikkullu tunngavilimmik inissiivissamik nunarput amigaateqarsimavoq, Ilaqutariinnermut Inatsisinillu atortitsinermut Naalakkersuisoq Martha Lund Olsen ilaatigut allappoq, nangillunilu:
- Inuusuttuaqqat inersimasunit pinerluttunut ingalassimatinneqarnissaminnut sunnernerlunniarneqartannginnissaminnullu pisinnaatitaaffeqarput, taamaattumillu pineqaatissinneqarsimanertik pissutigalugu inersimasut pineqaatissinneqarsimasut akornanniittariaarullutik, Martha Lund Olsen allappoq.
Inissiivik Sisimiuni inissisimasoq katillugit arfineq-pingasunik inissaqarpoq, immikkoortoq isumannaallisagaq sisamanik inissaqarluni immikkoortortarlu ammasoq aamma sisamanik inissaqarluni.
Meeqqat inuusuttuaqqallu pinerluuteqarsimasut isumaginninnikkut inatsisitigut Naalagaaffiit Peqatigiillu meeqqat pisinnaatitaaffii pillugit illersorneqarnissaat pingaaruteqartoq Naalakkersuisut oqaatigaat.