”Eksperimentet” oqallissutaalluarpoq
Filmi 2010-meersoq Louise Friedbergimillu ilitsersuiffigineqartoq meeqqat Kalaallit Nunaannut uternerannik piffissamilu tassani qanoq pisoqarneranik oqaluttuartuuvoq. Filmimi pisut pingaarnertut inuttaasup niviarsiap Gertip isaanit isigineqarput. Meeqqat misileraanermut ilaatinneqarsimasut ilaat Atlantikup avannaamiut illuannut qaaqquneqarsimavoq, taassumalu oqaluttuassartani oqaluttuaraa.
-Helen Thiesenip ”Eksperimentet”-imut peqataanini oqaluttuarimmagu tusarnaariartorpassuarnit nillertoqanngivippoq. Isertuanani oqaluttuarpoq. Misigisat nuanniitsut piffissami Kalaallit Nunaata Danmarkillu ullumikkut peqqissimissutigisaanneersut oqaluttuanik quianartunik akullattaarlugit. Minutsini 45-ni tusarnaartut tiguaqqavai, Birgir T. Møller Atlantikup avaannamiut illuanni aaqqissuussinermik ingerlatsisuusoq oqaluttuarpoq.
Tusarnaariat ilarpassui aamma assingusumik misigisaqarsimapput, ilaatigut meeqqat angerlarsimaffianni najugaqarsimallutik, Helen Thiesenillu saqqummiussereernerata kingorna meeqqat angerlarsimaffimminnit ungasissumut inissinneqarnermikkut eqqarsaatersuutigisartagaat tusarnaarianit isummersorfigineqangaatsiarpoq.
-Angajoqqaanit qimallugit ungasissumut inissinneqarnikkut maqaasineq pilersartoq arlalinnit oqaluttuarineqarpoq, kalaallillu arlallit oqaatsinik ajornartorsiuteqarfimmut inissinneqarnermi ajornartorsiutit pilersartut ilisarilluarpaat. Ataatsimut isigalugu unnuk nuannerluinnartumik ingerlanneqarpoq, aaqqissuisullu tusarnaariallu eqqarsaatissiissutaasinnaalluartunik nutaanik paasisaqarluarlutik angerlarput, Birgir T. Møller knr.gl-imut oqarpoq.
Filmi pillugu una atuarsinnaavutit aammalu pilerisaarutitaa takusinnaallugu: http://nimbusfilm.dk/Film/Spillefilm/Id32