Øysteinip ammaanersiorneq qilanaaraa
Øystein Slettemark sapaatiuppat OL-imi unammeqataaqqaarnissaminut piareeqqavoq. Peqqippoq, sungiusarluarsimavoq, ooqattaasarluni sisorarfissani misilittarpaa iluarisimaarlugulu.
Ujakkaarfissat naatsukkuutaarput, qattorngit sangoriagassallu arlaqarlutik, taamaattumik aalajangersimasumik sisorariaaseq atorneqartussaavoq, Øystein Slettemark oqarpoq.
Tamanna unammillernartuussanersoq Øysteinimut apeqqutigigatsigu taanna oqarpoq, sisoraatinik ujakkaartarfiit naatsunik isorartussuseqartut sangoriaqarluartullu siornali sungiusarsimallugit, nalunnginnamiuk taamatut ittuni unammisussaalluni.
Taamaattumik maannakkut unamminissamut piareersimalluni oqaatigaa.
OL-mik unammiffiususssami unnuaq siallerpoq, Øysteinip ujakkaarnissaanut tamanna akornutaassanersoq apeqqutigigatsigu taanna oqarpoq, ujakkartussanut allanut tamanna ajornartorsiutaassasoq, sisoraatit allat pujassaatillu allat atorneqartariaqassammata.
Ukiuunerani OL Vancouverimi maannakkut ammaanersiorneqarpoq. Tamanna sioqqullugu Øystein Slettemark oqaloqatigigatsinni qilanaarpoq, ammaanersiornermilu pisussat annertusut oqaluttarineqarmat, tamarmik qilanaarlutik. Ammaanersiortoqarpoq sikumi ishokeymik unammiffiusussami.
Øystein Slettemark ujakkaarluni ooqattaasarluni unammissaaq 10 kilometerinik isortutigisumik, taannallu iluatsilluariarpat marlunngorpat februaarip illuisa 16-ani , 12,5 kilometerimut unamminermi peqataassalluni.