Wæver Johansen: Mittarfiup immikkut eqqaaneqarnera qujanarpoq
Pingaartumik oqaaseqatigiit: ”Erseqqissassavara Nunatsinni mittarfiliassat tullissaat Qaqortumiissammat” kujataani kommunimi nuannaarutigineqarput. Wæver Johansen naapertorlugu tamanna siunissamut isumallualersitsivoq.
-Kujataata angallannikkut aaqqissuussaanerata pitsanngorsaavigineqarnissaa, taamatullu aamma angallassinermik tamanut iluaqutaasussamik kommunillu siunissami ineriartorteqqinneqarnissaanut pingaarutilik taamaalilluta naatsorsuutigisinnaanngorparput, Jørgen Wæver Johansen oqarpoq.
Kujataani aatsitassarsiortoqarnissaa pillugu innuttaasunik taasisitsisoqarnissaa aamma sammineqarpoq. Tamanna Hammondip siunnersuutigaa, Kommune Kujallermilu borgmesterimit taperserneqarpoq.
-Kujataani apeqqummut tassunga aalajangeeqataanissarput pissusissamisuuginnartutut isigaarput, taamaalillutami ingerlariaqqissinnaaniassagatta. Maani Kujataani inuussutissarsiutinik inerisaanissap qanoq ittuunissaa pillugu innuttaasunik suli annerusumik peqataatitsinisssamut periarfissaq manna tikilluaqqutigu. Siunnersuutigineqartoq pissanganarluinnartutut nunatsinni tamat oqartussaaqataanerannut pitsaalluinnartutut isigaara, borgmesteri oqarpoq.
