WWF-p ataatsimiisitaliarsuaq apeqquserpaa

Tamanna saqqummerpoq Atlantikup Avannaani Suleqatigiit, puisinniarneq arfanniarnerlu pillugit ippassaq oqallitsitsimmata, tassanimi WWF-p allattaanerata Gitte Seeberg-ip IWC isornartorsiorpaa ilisimatuussutsikkut paasisanik amigaateqarnerarlugu.

- Arferit amerlassusii pillugit ilisimatuunit isumaqatigiittoqartinnagu arfanniartoqartariaqanngitsoq isumaqarpugut. Ilisimasakippallaarpugut, aamma silap allanngoriartornerata sunniutai pillugit.

Taassuma IWC politikkikkut agguaasarfiunerarlugu isornartorsiorpaa.

- Kingullermik ataatsimiittoqarmat arfernik pisassiisoqarpoq IUCN-imi nungutaanissaminnut ulorianartorsiortutut nalunaarsorneqarsimasunik, tamannalu ajorluinnarpoq, Gitte Seeberg oqarpoq.

IUCN tassaavoq nunarsuaq tamakkerlugu suliniaqatigiiffik, uumasut nungutaanissaminnut ulorianartorsiortut pillugit nalunaarsuisimasoq. Nalunaarsukkanut ilaapput tikaagulliusaat qilalukkallu.

Pinngortitaq pillugu nunarsuaq tamakkerlugu suliniaqatigiiffiup isornartorsiuinera biologip, Mads Peter Heide Jørgensenip isumaqatiginngilluinnarpaa. Taanna Pinngortitaleriffimmi atorfeqarpoq IWC-illu ilisimatuussutsikkut ataatsimiisitaliami ilaasortaalluni.

- Eqqumiigisorujussuuara kalaallit arfanniartarnerat piujuaannartitsisinnaanngitsutut WWF-p nalilermagu. Tassami arfanniarneq pillugu ataatsimiititaliarsuaq sukannersunik nalilersuinermini malittarisassaqarmat. Aammalu qangarsuarli nalilereersimavoq kalaallit piniariaasiat piujuaannartitsinissamut ulorianartorsiortitsisuunngitsoq, Mads Peter Heide Jørgensen oqarpoq.

Taassuma paasimiunaatsippaa WWF kisimiilluni arferit qanoq amerlatiginerannik naliliimmat, imaluunniit paasissutissanik allat piginngisaannik peqarsimanersoq apeqquserlugu.

- Pinngortitaq pillugu nunarsuaq tamakkerlugu suliniaqatigiiffik tutsuiginartumik suliniuteqartuugaluarpoq. Arferilli pillugit ilisimatuussitsikkut paasisanit allaanerusumik nalilersuisutut ippoq, politikkimut sangusutut illuni, Mads Peter Heide Jørgensen oqarpoq.