WWF: Mestersvigip eqqaani piiaaffik avatangiisinik silaannarmillu ajoqusiissaaq
Tunumi pinngoqqaammik molybdænimik piiaanerup akia uumasunut, naasunut, silaannarmut imaanilu avatangiisunut tussaaq.
Taama Pinngortitaq pillugu nunarsuarmi suliniaqatigiiffik WWF Canadamiut selskabiata Greenland Resources Inc.-ip Tunumi Station Mestersvigip eqqaani piiaaffimmik ammaasinnaanera pillugu Naalakkersuisut tusarniaanerannut akissuteqarpoq.
Selskabip molybdæn kimittorsagaq piiaaffimmiit Nyhavnip avannaani 30 kilometerit assartortassavaa, tassani umiarsuarmik nunanut allanukaanneqartassalluni. Imaani angallannermik pilersitsinissaq WWF-imit ernummatigineqarpoq.
Tunumi piiaaffimmik suliniut
Canadamiut selskabiata Greenland Resources Inc.-ip pinngoqqaat molybdæn aatsitassarsiorfimmi Mestervigimit sineriak atuarlugu kujammut kimmut 30 kilometerinik ungasitsigisumiittumi piiarusuppaa.
Molybdæn sisammik tunisassiornermi ilaatigut atorneqartarpoq.
Ukiuni 18-ini ulloq unnuarlu piiaasoqarnissaa piffissamilu molybdænimik kimittorsakkamik 22.000 tonsinik piiaasoqarnissaa pilersaarutaavoq.
Piiaaffimmi 300-nit 500-t tikillugit sulisoqarnissaa naatsorsuutigineqarpoq.
- Pinngortitaq pillugu nunarsuarmi suliniaqatigiiffiup WWF-ip ernummatigaa sumiiffimmi umiarsuarmik angallannerup Kangertittivarmut paavanullu qanoq sunniuteqarsinnaanersoq, suliniaqatigiiffik tusarniaanermut akissuteqarluni allappoq.
Imaani avatangiisit aamma sunnerneqassapput, Greenland Resources Inc. Avatangiisinut Sunniutissanik Naliliinermut (ASN) suliassat nassuiaataanni maanna tusarniutigineqartumi Ilisimatitsivoq.
- Aatsitassarsiorfik imaani avatangiisinut ungasissumiittussaagaluarluni Malmbjergip eqqaani aatsitassarsiornermit imaani avatangiisit sunnerneqarnissaat naatsorsuutigineqarpoq, selskabi ASN-imut suliassat nassuiaataanni allappoq.
Sunniutit sorpiaat pineqarnersut misissoqqissaarneqassaaq.
Suut tamarmik piareersutut oqaatiginnginneranni imaani avatangiisit imaanilu uumasut pillugit amerlanerusunik misissuisoqassasoq, selskabi allappoq.
Taamaattorli innersuussutigineqarpoq Nyhavnip eqqaani Noretimilu piiaaffimmit sinnikut sinnerussut (tailings) toqqorneqartussat siornatigut aqerlussamik piiaaffiusimasumit mingutsitsinermeermata.
Aatsitassarsiornissamilli suliniutip nutaap assersuutigalugu ammassaqassutsimut eqquiumaarnissaa naatsorsuutigineqartariaqartoq, selskabi ilisimatitsivoq.
- Aatsitassarsiorneq ammassaat suffinerannut, pingaartumik ukioq manna Noretimi suffinerannut sunniuteqarsinnaavoq. Assersuutigalugu aatsitassarsiornermit sinnikut Noretimut inissinneqarneratigut pujoralaat aalisakkat suaannik qallerneqarsinnaapput tukertut amerlassusaat ikilisinneqarlutik.
Greenland Resources Inc. Oqaaseqartinneqarniarnerat maannamut iluatsissimanngilaq, KNR-ip saaffiginnissutaanut qisuariarsimanngimmat.
Piiaaffimmik suliniuteqarnermi nannut arferillu eqqugaasinnaapput
Aatsitassarsiorfiusinnaasoq nunani allanngutsaaliukkani annersaanniippoq sumiiffilli eqqissisimatinneqarani.
WWF-imiilli erseqqissaatigineqarpoq sumiiffimmi uumasorpassuaqarlunilu naasorpassuaqarmat. Naasut ilai tamaani taamaallaat naasarput uumasoqatigiippassuillu pingaartumik ukiuunerani aasaaneraniluunniit tamaaniittarlutik.
Assersuutigalugu tamaani sineriak nannunut pingaaruteqarpoq. Sumiiffimmi nannut illersorniarlugit Greenland Resources taamaammat immikkut aamma pilersaarusiortariaqarluni.
- Sumiiffimmi qajannaatsumi aatsitassarsiornissamik suliniuteqarnissamut periarfissaqarnermi nannut nerisat tipaannik kajumilersinneqannginnissaannut iliuuseqartoqarnissaa salliunneqarluinnartariaqarpoq, kiisalu inuunermik annaasaqarnissaq nannunillu toqutsinissaq pinngitsoortinniarlugit nannunut patruljenik ilinniartitsinissamik pilersaarusiortoqarluni, WWF allappoq.
Qilalukkat upernaakkut aasakkullu aamma tikittarput. WWF-imiillu ernummatigineqarpoq, selskabip atortuutigigallagaani assersuutigalugu umiarsuarnit assartuutinit uuliakoortoqassagaluarpat qanoq passunneqarnissaanik navianartorsiornermi pilersaaruteqanngimmat.
- Pinngortitaq pillugu nunarsuarmi suliniaqatigiiffimmit WWF-imit uuliamik mingutsitsisoqaratarsinnaanerata annikillisarnissaanut selskabip qanoq iliornissamut ASN-imut nassuiaammi nassuiaateqarnissaa aalajangiisutut isigaarput, soorlu aamma kuuttoqaratassappat passussinissamut upalungaarsimatitsineq ujartoripput.
Soqutigisaqaqatigiiffimmit pinngoqqaatip molybdænip piiarneqarnerani aatsitassami atortut navianarsinnaasut sunik imaqarnerannik VVM-imi suliassanut nassuiaammi paasissutissanik amigaateqarnera aamma isornartorsiorneqarpoq.
