WWF: Kalaallit Nunaata pinngortitaani immikkut mianerisariaqartut aajuku
Nunarsuaq tamakkerlugu pinngortitaq pillugu suliniaqatigiiffiup WWF-ip nalunaarusiaani nutaami tamanna inerniliunneqarpoq. Suliniaqatigiiffiup nunatsinni sineriak, kujataanit nunap isuanit avannamut Inuarfissuaq Inglefiel Land tikillugu, misissuiffigaa.
Nalunaarusiaami nunami pinngortitaq pineqarneruvoq siusinnerusukkut nalunaarusiami kitaata imartaa pingaarnerutinneqarluni.
Kitaata imartaa pillugu nalunaarusiaq maajip qaammataani saqqummersinneqarpoq.
Nunarsuaq tamakkerlugu pinngortitaq pillugu suliniaqatigiiffiup nalunaarusiami inerniliunneqartut kalaallit politikeriinit atorluarneqarnissaat kaamaattuutigaa siunissami pissuussutinik aqutsinissamut isumassarsiorfiusinnaammata.
Sumiiffiit ilaat pisortatigoortumik allanngutsaalineqarnissaannik toqqaanissamut atorneqarsinnaapput imaluunniit aatsitassarsiorfioqqusaanngitsunik toqqaanermut atorneqarsinnaallutik.
- Soorlu aalisagaqarfiulluartuni uuliasiornermi mingutsitsisoqarsinnaavoq aalisarnerlu eqqorneqarluni, aatsitassarsiornermi pinngortitaq mingutsinneqarluni aamma eqqorneqarsinnavoq, Charlotte Margaret Moshøj nunarsuaq tamakkerlugu pinngortitaq pillugu suliniaqatigiiffimmi WWF-imi biologi taama oqarpoq.
Taamaattumik pinngortitami piaqqiorfiulluartut piniarfigineqarluartullu illersorneqarnissaat Kalaallit Nunaata soqutigisariarpaa, Charlotte Margaret Moshøj oqarpoq.
Nalunaarusiami ilanngullugu tikkuarneqartunut ilaavoq Kalaallit Nunaanni nunap immikkoortuini ilisimasat annertunerusariaqartut.
Nunap immikkoortuini ileqqut malillugit atuinerit aamma nunami pinngortitap ataqatigiinnera pineqartillugu.
Tamakkua tunngavigalugit nunap immikkoortortai toqqarneqartut qulit eriagisassatut naliliiffigisariaqalersinnaapput. Sumiiffiit assigiinngitsut taakkua tassaapput: Avanersuarmi Inglefield Land, Qaanaap eqqaani/timaani ikeq Inglefield Bredning, Kalaallit Nunaata avannaata-kitaani sineriammut qanittoq Sigguup ilaa, Nuussuaq Qeqertarsuarlu; 5. Nassuttuup Isortullu akornanni nuna avasinneq, Paamiut eqqaa, Nassuttuup timaa, Nuup Kangerluata timaa, Kangilinnguit eqqaat kiisalu Kalaallit Nunaata kujasinnersaa.
