WWF: Imartat arfinillit illersorneqarlik
Imartat taakku siunissami pingaaruteqaannassappata maanna iliuuseqartoqalereertariaqartoq, WWF allappoq.
Imartat pineqartut silap pissusiata allanngoriartornerata sunniuteqaataanut soorunami eqqorneqassagaluartut, tamaani aalisakkat uumasullumi allat siunissami pilersuinermut pingaaruteqaannarnissaat ilimanaateqartoq, WWF-ip nalunaarusiaani atuarneqarsinnaavoq.
Imartat arfinillit Nunap Isuaniit avannamut Qimusseriarsuup tungaanut misissorneqarsimapput.
Imartat pineqartut tassaapput Upernaviup avataa, Qeqertarsuup Tunua, Sisimiuniit avannamut imartaq Store Fyllas Banke, Søndre Isortoq Fjord Maniitsullu eqqaani kangerluup paava, Nuup avataani Fyllas Banke kiisalu Paamiut eqqaanni Danas Banke aamma Narsalik Banke.
- Imartat pineqartut taakku arfinillit kalaallit aningaasarsiornerannut kulturiannullu siunissami aamma pingaaruteqarumaarput, pisuussutit uumasut pingaaruteqartutut siunissami aamma inissisimajumaarlutik, Eva Garde, nalunaarusiornermi pingaarnerit ilaattut inissisimasoq ilaatigut oqarpoq, nangillunilu:
- Imartat siunissami qanoq iliornikkut iluaqutigineqaannarsinnaanersut nalunaarusiami tikkuarneqarpoq, assersuutigalugu uuliasiortoqalissappat umiarsuilluunniit assartuutit tamaani angallannerulissagaluarpata iliuusissat tikkuarneqarlutik. Kalaallit Nunaanni siunissami aatsitassarsiortoqarnissaanut uuliasiortoqarnissaanullu atatillugu nuna immikkoortukkualuttunut agguarneqarsimasoq takusinnaavarput, sumi aatsitassarsiortoqarsinnaallunilu uuliasiortoqarsinnaanersoq takuneqarsinnaalluni, sumilu inerteqqutaanersoq, nalunaarusiattalu matumani isumassarsiffiusinnaanissaa neriuutigaarput, Eva Garde oqarpoq.
