Uumasut assigiinngiissitaarnerat pillugu isumattorsaqatigiinneq politikerinit tigulluarneqartoq

Uumassusillit assigiinngissitaarnerat pillugu inuusuttunut isumattorsaaqatigiisitsineq nunatsinni siullerpaamik Katuami marlunngormat unnukkut ingerlanneqarpoq. Isumaallu FN-imut apuuneqassapput.

Aaqqissuussinerlu avatangiisinut pinngortitamullu naalakkersuisup Jess Svanep nuannaarutigaa.

- Aaqqissuussaq torragisorujussuuara nuannarerujussuarlugulu. Inuusuttut namminneerlutik pinngortitaq atugarput ajornerutillugu kingornunniarnagu, kinguassaminnullu ajornerutillugu tunniunniarnagu oqariartuuteqarmata, Jess svane oqarpoq.

Jess Svanep naalakkersuisuulluni inuusuttunik aaqqissueqatiseriumannittunik saaffigineqarluni nuannaralugu, inuusuttullu politikerinit tusarnaarneqartut eqqaavai.

- Inuusuttut massakkut qanoq oqariartuuteqarnersut pillugit angerlaassaqartussaavugut. Politikkikkut sakkussattut ilaliutissallugit naatsorsuutigivagut, Jess Svane oqarpoq.

Aamma Tillie Martinussenip Suleqatigiissitsisuninngaanneersup pissarsiaqarsimalluni oqaatigaa:

- Aaqqissuussaq nuannarivara, Tillie Martinussen oqarpoq.

Inuusuttut assersuutitut biilit innaallagiatortut tamanit atorneqalertikkusuppaat, imeq maangaannartoq salinneqartittalerusullugu, suliffissuarnilu aammalu takornariaqarnermi pitsanngorsaasoqarsinnaasoq eqqaagaat, Tillie Martinussen nassuiaavoq.

- Politikeriusugut pinngortitamut avatangiisimullu suliniuteqarnissatsinnik inuusuttut kissaateqarlutik oqariartuutigaat, Tillie Martinussen oqarpoq.

Aammattaaq Sofie Geisler Inuit Ataqatigiinneersoq aaqqissuussamit pisarsiaqarsimavoq.

- Nukik inuusuttuninnganniit unnummut tunniuneqartoq takutinneqartorlu nuannersorujussuuvoq, pinngortitamik avagiisinik silalu pillugit apeqqutinik suliaqarnerminni peqataarusunnertik uppernarsarmassuk, Sofie Geisler oqarpoq.