Atuagaq nutaaq Nunarput namminiilissappat kalaaleq imminut nalligisuujunnaartariaqarpoq
Naak nunatsinni ilinniartitaaneq ajornartorsiutaagaluartoq, ilinniagallit amerliartuinnarput. Kalaallillu amerlanerpaat nunatsinniinnertik nuannaarutigaat. Tamannalu ukkatarineqarnerusariaqarlertoq, ujarassiooq, professori Minik Rosing isumaqarpoq.
- Pissutsit iluatsittut nuannaarutigineqarluarpata Kalaallit Nunaata siumukarneranut iluaqutaasorujussuussaaq, atuakkami "Rejsen til tidernes morgen - Jorden set fra Grønland"-mi atuakkiortoq, Minik Rosing oqarpoq.
Minik Rosingip atuakkami nammineq misigisani ilaatigut oqaluttuarai, ukiullu ingerlanerini ilisimatusarnikkut suliani oqaluttuaralugit.
Nunatta qanoq ineriartorluarnerunissaa atuakkiortup aamma isummersorfigaa.
Namminersulernissamut millisisitsisoq
Aalisartut piniartullu 60-70-ikkunni piginnaasatik tulluusimaarutiginerugaat, ilaatigut oqariartuutigaa:
- Ukiut qulikkuutaat kingulliit ingerlanerini uagut nunap inoqqaajunerput tunngavilersuutiginiarneqakulasoq, takusarpara. Assersuutigalugu immap qanoq aalisagaqartigineranik biologinit ilisimasaqarnerunerartarlutik. Aap, soorunami aalisartut ilisimasaqartorujussuupput. Aamma arlaleriarlunga tusartarpara, inuit imminnut ajunngitsutut nalilertartut, kisianni inuiaqatigiinnik ajunngitsoqanngilaq ajortoqaranilu.
Tassalu inuit ilaat nunap inoqqaavinik tunuliaquteqarnertik tunngavilersuutigalugu isumakkeerneqartutut imminnut isigisarnerat ajutoornerpassuarnut peqqutaasoq nunattalu namminersulernissamut periarfissaanik millisisitsisoq, Minik Rosing atuakkiamini allappoq.
Kikkulluunniit iliuutsiminnut akisussaasuusut, taanna isumaqarpoq.
- Taama allakkama inuit ataasiakkaarlutik tamarmik imminnut akisusaaaffigisuunerat pivara. Tassa inuit suminngaanneersuunertik aalajangiusimaannarpallaarnagu, ataasiakkaarlutik tamarmik nunartik, imminnut siunissaminnullu akisussaasuullutik, professori nassuiaavoq.
