Washingtonimiit Nuummut: Joanie Simon amerikamiut nunatsinni aallartitattaaraat
Amerikamiut nunatsinni aallartitaat inuttamikkut taarserput.
Joanie Simon nunatsinni amerikamiut konsuliattut nutaajuvoq, siunissamilu nunat taakku marluk akornanni attaveqatigiinneq nukittooq qulakkeerinniffiginiartussaavaa.
- manna tikillugu pissutsit pissanganarsimaqaat. Naapitannit tamanit tikilluaqqusaasimaqaanga, maaniinneralu nuannerluinnarpoq. Misigisimavunga iluatsitsisimaqalunga, Joanie Simon oqarpoq, taassuma siusinnerusukkut konsuliusimasoq Sung Choi taarserpaa.
Konsulitut nunatsinni sulinissani ukioq ataaseq piareersarsimavaa.
- Isumaqarpunga, nunarsuarmi tamarmi maanna eqqumaffigineqartorujussuanngortoq, issittup qanoq pingaaruteqartiginera. Maaniippummi nunarsuarmi tamanit unammillissutigineqarusuttut. Uanga nammineerlunga nunami issittuminngaanneersuuvunga, isumaqarpungalu peqatigiilluta nunarsuarmioqatitta iluaqutissaannik nunarsuarmullu tamanut siunissami pingaaruteqarluinnartunik pinngortitseqatigiissinnaassasugut.
Kalaallit Nunaat USA-lu peqatigiinnialerpat?
- Aap, taamaalluinnarpoq tassa pingaarnerpaaq suliassarput Kalaallit Nunaat USA-llu peqatigiilernissaat, Joanie Simon oqarpoq.
Taanna USAp avannamut kitaatungaaniittumi statemi Washingtonimeersuuvoq, siornatigullu naalagaaffiup nunanut allanut attaveqaataatut Vietnamimiittumi illoqarfimmi Ho Minh-imi sulisimavoq, tassaniinnerminilu amerikap Vietnamimilu suliffissuit attaveqatigiinnerisa nukittorsarnissaannik suliaqartuusimalluni.
Maannalu tassa suliai nunarsuup kujasissuaniit avannaatungaanut nuupput.
Amerikamiut Nuummi aallartitaqarfiat
Pisortatigoortumik juunip ulluisa qulinganni 2020-mi ammarpoq
Aallartitaqarfik Issittumi Sakkutooqarfiup allaffeqarfiani Nuummiippoq
Joanie Simon amerikamiut aallartitaqarfiani juunip qiteqqunnerani sulilerpoq
Taassuma aallartitaasimasoq Sung Choi kingoraarpaa
Aallartitaqarfimmi inuit arfinilli sulipput.
- Massakkorpiaq, nutaajunera pillugu inunnut oqaluttunut tusarnaarneruvunga oqalunnginnerullunga. Tusarusuppara kalaallit USA-mut suleqateqarnerminni qanoq misigisaqarsimanersut aammalu suup tungaanut ingerlarusunnersut, taava taamaalioreeruma tunngavissara maannakkut pilersinneqareersoq sanarfillugu aallartissavara, taanna oqarpoq.
Aallaavissakkalu ilaatigut tassaapput suleqatigiinnissamut isumaqatigiissutit, siorna nunat taakku marluk apriilimi tunngavilersimasaat.
Isumaqatigiissutillu taassuma imaraa; suliniutit programmillu pilersaarutit arlallit Kalaallit Nunaannut suleqateqarnermi nukittorsaasussat soorlu ilaatigut, ilinniarfitsigut, takornariaqarnikkut aammalu aatsitassarsiornikkut nukittorsaaffiusussat.
Isumaqatigiissutitullu tunngaviliisut taakku pilersinneqarput, Nuummi Amerikamiut konsuleqarfiata pilersinneqarnerata kinguninnguatigulli.
AAMMA ATUARUK Amerikamiut sinniisuat aasamut unilersoq: Sinniisoqarfik pitsaasumik tunngaveqartillugu qimannissaa anguniarpara
Konsuuleqarfik juunimi 2020-mi ammarneqarpoq ullumikkullu arfinilinnik sulisoqarluni.