Amerikamiut sinniisuat aasamut unilersoq: Sinniisoqarfik pitsaasumik tunngaveqartillugu qimannissaa anguniarpara
USA-mi nutaamik præsidenteqalerpoq. Demokraatineersullu Joe Bidenip præsidentitut atuuffik republikanerimit Donald Trumpimit pingasunngormat pisortatigoortumik nangippaa.
Tamatuma saniatigut amerikamiut Danmarkimi aallartitaat, Carla Sands aamma unilerpoq.
Amerikamiut sinniisuat, Sung Choi aasap tungaanut Nuummi allaffimminiiginnarallassaaq.
Taassuma 2021-mi aasap tungaanut sinniisuunissaa pilersaarutaajuaannarpoq. Sinniisup nunatsinnut tunngassuteqartut 2019-imi maajimi suliaqarfigilerpai.
Taanna allallu marluk 2020-mi juunip ulluisa qulinganni Issittumi Sakkutooqarfiup Nuummi illorsuani allaffeqalerput. Suleqatai allat marluk tassaapput Pernille Kleemann aamma Poul Bloch Jensen.
AAMMA ATUARUK Assit takukkit: Amerikamiut sinniisoqarfiata erfasoq Nuummi amugaa
Sinniisoqarfiup nunatta USA-llu akornanni politikkikkut inuussutissarsiuteqarnikkullu attaveqatigiinnerup pitsanngorsarnissaa sulissutigisussaavaa.
Sung Choi sinniisoqarfimmi maanna aqutsisuuvoq, nunaqavissunilli marlunnik allaffimmi sulisoqalernissaa amigaataasoq, Sung Choi KNR-imut nassuiaavoq.
Sinniisoqarfik pitsaasumik tunngaveqartariaqartoq
- Atuuffinnut marlunnut atorfinitsitsissaagut. Taakku kalaallisut, danskisut tuluttullu oqalussinnaassapput.
- Taakku nuna inuiaqatigiillu pillugit ilisimasaqassapput. Inuit taakku ineriartortinnissaannut ikiuunniarpugut, taakkuli aamma nunatta USA-llu akornanni attaveqatigiinnermik ineriartortitsinermut ikiuutaassapput.
Atorfiup aappaa Greenland Public Engagement Assistantiuvoq, aappaalu Greenland Political and Economic Specialistiulluni. Tassa kalaallisut politikkimut aningaasaqarnermullu immikkut ilisimasalik.
Sung Choi, Pernille Kleemann Eavan Cullylu sinniisoqarfimmi maanna sulisarput.
AAMMA ATUARUK Carla Sands isumaqatigiissut pillugu: Kalaallit Nunaat USA-mut saniliussaaq nukittooq
Pernille Kleemann allaffissornermi sulissisuuvoq, taassuma ulluinnarni allaffissorneq suliarisarpai.
Eavan Cully amerikamiut diplomateraat taassuma pisortanut tunngasut akisussaaffigai.
Poul Bloch Jensen politikkimut aningaasaqarnermullu immikkut ilisimasalittoq atorfeqarsimasoq unissimavoq.
- Inuit oqaasii atorlugit attaveqarsinnaasumik pisariaqartitsivugut, Sung Choi oqarpoq.
Tamanna sinniisoqarfimmut siunissami pitsaasumik tunngaveqartitsissasoq, taanna oqarpoq. Atorfiilli inuttassarsiniarniarat maannamut ajornakusoorsimavoq.
- Akissarsiatigut unammillersinnaasumik neqerooruteqartartugut isumaqarpugut, qinnuteqartartulli atorfinnut nalornissuteqarsimapput. Sinnissoqarfiup sinissaa pillugu nalorninartoqarsinnaavoq, kisianni Nuummi atorfiit pitsaasut unammilleruminaatsut aamma amerlapput, Sung Choi oqarpoq.
