Minik: Sungiusarluarnerusinnaavugut
Nunanut allanut unammisartuni arsaqataasartut nutaat arfinillit nunanut allanut unammisarnernut sungiussisimannginnerat aamma Savalimmiormiut anginerunerat oqimaannerunerallu kalaallit ajorsarnerannut pissutaaqataasut Minik Dahl Høegh oqarpoq.
- Aallartinnerlunnalaarpoq, arsaqatigisalikkagut nutaat arfiniliugamik, taavalu nunanut allanut unammisartuunermik misilittagaqaratik, taavalu aamma klubbeminni, inuusuttuullutillu, taakkua nunanut allanut unammisartut arsariaasiat tiguniarsarigamikku taavalu forsvarini arsartutoqqagut amigaataallutik, Minik Dahl Høegh taama oqarpoq.
Kalaallit unammisartui arfininngornermi unamminermi ajorsangaatsiarput savalimmiormiut 37-nik isertaqartut kalaallit 22-nik isertitaqarlutik. Sapaammili unamminermi qulinik isertitakinnerullutik ajorsarput.
AAMMA ATUARUK Nunanut allanut unammisartut ajorsangaatsiartut
- Aallartilluartorujussuugaluarpugut, kisianni amigaatigaagut arsartut tullii, aamma qaffasissumik niveaumi arsarsinnaanissaat, taavalu arsartartut Miki-Nuka, Akutaanerlu qaffasissumik arsarsinnaagaluarlutik tullii amigaataapput, taavalu uanga ajoquseqqagama angrebersinnaananga ajoraluartumik, Minik Dahl Høegh oqarpoq.
Sapaammi unamminermi immikkoortup aappaani amerlanerusunik isertitaqarniarnerat ajornakusoorsimavoq.
Tamannalu Savalimmiormiut kalaallinut sanilliullutik anginerugamik oqimaannerullutillu.
- Uani unamminermi nikingassutiginerpaavarput, Savalimmiormiut kalaallinut sanilliullutik nukittoorujussuugamik, savalimmiormiullu kilorpassuarnik oqimaannerullutik, kalaallit arsartartui
80 kilo ataallugit oqimaassuseqarput, taavalu Savalimmiormiut 90 kilo qaangerlugit oqimaassuseqarlutik
Minik Dahl Høegh taama oqarpoq.