Aapparisamik malunnaarsaarluni atoqateqarneq pineqaatissiissutaasalissasoq
Inatsimmi maanna atuuttumi akiuussinnaanngitsumik kinguaassiuutitigut atoqateqartut aappariinnerup avataatigut pisimappata aatsaat eqqartuunneqarsinnaapput. Tamannalu malunnaarsaarluni atoqateqarnermik taaneqartarpoq, soorlu atornerlunneqartup itiisoorujussuarmik sinitsilluni atornerluinermut akiuussinnaannginerani pisimappat.
Tamannalu maanna allanngortinneqartussanngorpoq, aappariinnerup iluani avataanilu malunnaarsaarluni atoqateqarneq eqqartuussutaasinnaanngortillugu. Allannguutissarlu Pinerluuteqarsimasunik Isumaginnittoqarfiup pisortaata Naaja Nathanielsenip nuannaarutigaa.
- Qujanartumik. Kiisami inatsit nutarterneqalerpoq. Tamanna pissutigalugu nuannaarnermik talikkaluunniit apparpiarsinnaanngilakka, Atuagagdliutinut taama oqarpoq.
Kalaallit Nunaata Politiivini unnerluussisuunerup Morten Nielsenip aviisimut erseqqissaatigaa inatsit maanna atuuttoq malillugu nakuusernikkut imaluunniit nakuusernissamik siorasaarinikkut pinngitsaaliillutik atoqateqartut eqqartuunneqarnissaat periarfissaareersoq. Tamannalu aappariinnerup iluani avataanilu atuuppoq.
Nutaatut periarfissaalertussaq tassaavoq aappariinnerup iluani akiuussinnaanngitsumik pinngitsaaliilluni atoqateqartut eqqartuunneqarsinnaanissaat.
Allannguutissaq ilaatigut Kalaallit Nunaanni Politiinut, Illersuisut peqatigiiffiannut, Kalaallit Nunaanni Eqqartuussivimmut aamma Pinerluuteqarsimasunik Isumaginnittoqarfimmut tusarniaassutigineqaleruttorpoq.
