VIDEO Aapparisap persuttaasartup Randip najungasui innarlerpai
- Ajornerpaaq misigisara tassaavoq, najungasukka innerlermata. Taavalu tassaniugunarpoq, assigiinngitsunik bøjlinik anaartartippunga tilluartilluangalu, Randi Vestergaard Evaldsen KNR-imut oqaluttuarpoq.
Angut ukiuni arfinilinni aapparivaa, aappariinnerullu aallartilaarnerani persuttarneqarneq ajorluni. Piffissalli ingerlanerani aapparisimasap piumasai amerliartorput. Tamatumalu kingorna persuttaanerit aallartipput. Randi Vestergaard Evaldsenilli aappariinnerup pitsaanerulernissaa neriuutigisarsimagaluarpaa. Pissutsilli pitsasseriarujussuanngillat.
- Anniartitaanerma iluani, ukiut taakku ingerlaneranni naggataatigut anniartitaanera maluginngitsoortalerpara. Allaanngilaq annernarunnaartoq, Randi Vestergaard Evaldsen taama oqarpoq.
Persuttarneqartarnini ajortuusoq uummatimini nalunngikkaluarlugu, Randi Vestergaard Evaldsen oqarpoq. Kisianni aapparisimasaata persuttaasarnera pillugu oqaloqatiginiaraluaraangagu angut kamattarsimavoq, Evaldsenilu periarfissaaleqisutut misigisarsimalluni.
- Qimaarusukkaluarlunga, iluamilli sumukarfissaqarnanga. Misigisimallunga, kammalaatinnut ilaquttannulluunniit oqaluttuaraluaruma... Kia upperissavaanga? Qanoq tigussavaat?, Randi Vestergaard Evaldsen oqarpoq.
Aamma atuaruk Ikiortissarsiorit paasisaqarnerullutillu
Evaldsenilli pissutsit qatsuppai, qimannissaanullu eqqarsarneq sumi annertunerulersoq eqqaamavaa.
- Tassani piffimmi, Danmarkimi, atuarpunga kingornalu sulillunga. Danmarkimiinninni pilatseqattaarpunga, aaqqinnissamalu tungaanut Danmarkimiittariaqarlunga. Taava januarimi 2012-imi kingullermik suliaritippunga, aprilimilu misissortinninni nakorsap oqarfigivaanga, iliuarsisimasunga. Tassani narkosereerlunga iterama eqqaamavara ingerlaannaq imminut oqarfigalunga: tassa. Ajortoqaqqippat angerlassaanga, Randi Vestergaard Evaldsen oqarpoq.
Aamma atuaruk Ukiuni 27-ni persuttaanertalimmik inooqatigisaminit qimaasoq
Tamatuma kingorna atugarisani pillugit ilaquttaminut oqaluttuarsimalluni, aapparisimasaminut oqaluttuarpoq.
- Kisianni tassani angajoqqaakka oqarfiginikuunngilakka. Aatsaat kingusinnerusukkut oqarfigaakka. Kisianni isertuussaata oqaluttuarisimallugu oqaruma paarnaassallugu nalunnginnakku, Evaldsen oqarpoq.
Aamma atuaruk Thomasip kamannini oqaluuserisinnaannginnamiuk persuttaasalerpoq
Aamma atuaruk Aapparisamit persuttagaaneq inuunerup sinnerani kingunerlutsitsisarpoq
Randi Vestergaard Evaldsen oqaluttuarpoq, aapparisimasami qimareernerata kingorna sivisuumik imminut nassaareqqinniartariaqarsimalluni. Piffissalli ingerlanerani siuariartuaarpoq. Ullumilu asannittumik aappaqarluni oqaluttuarpoq. Persuttarneqartarsimaninili pissutigalugu sillimariartarsimavoq.
- Ajortoqarnissaa immaqa ilaannikkut utaqqipajaartarnikuuara. Kisiat masssakkut ukiut marluk sinnerlugit aapparereerlugu, inuuniga muminnikuuvoq ingerlalluarnernikuullungalu. Taamaammat arnanut massakkut persuttartittartunut, qimaarusuttunut imaluunniit aniguerusuttunut takutikkusuppara, illuatungaani qaamaneqartoq, Randi Vestergaard Evaldsen taama oqarpoq.
