VM-mut neriuutit coronap akornusersinnaavai
Assammik arsarnermi nunani tamalaani unamminissat aaqqissuussat allarpassuit assigalugit coronamit eqqugaapput. Panamerikamiut unammersuarnissaat mininneqanngillat. Mexico aaqqissuisussatut tunuarpoq aaqqissuisussallu nutaat tallimanngorneq augustip 28-at toqqarneqassapput.
- Maannakkut killiffik eqqarsaatigalugu tamarmik nalorninartumiipput. Nunalli tamat assammik arsarnermi kattuffissuata IHF-ip piumasaraa VM-p naggataarneranut peqataasut tamarmik anngunniuteqqaarsimassasut, angutit assammik arsarnermi nunanut allanut unammisartut angalasarnerannu aqutsisut Kurt Lauritsen KNR-mut oqarpoq.
Taanna aamma allatut pingaarutilimmik inissisimavoq. Panamerikamiut kattuffianni avannarnermi NACHC-mut naalisarneqartartumi unammersuarnermut aaqqissuusaanermullu ataatsimiititaliami siulittaasuuvoq.
- Pilersaarutit malillugit VM-mut anngunniunnerit peqataaffigisassavut novemberip aappaaniit arfineq pingajuata tungaanut pissapput. Maannamut kisiartaalluni Puerto Rico aaqqissuisuujumalluni nalunaarpoq. Tamanna tallimanngorneq augustip 28-at aalajangiiffigineqassaaq, Kurt Lauritsen oqarpoq.
USA-meersut nunani allani angalasut
Nalorninartoq alla tassaavoq nunat sorliit peqataasinnaanersut imaluunniit nunanut allanut unammisartuni katersortitsisinnaanersut.
- Canada assersuutigisinnaavarput, Kurt Lauritsen nassuiaavoq.
- Canada sinnerlugu nunanut allanut unammisartut arlallit Europami najugaqarput Canadamullu nunamit allamiit tikinnermi piumasaqaataavoq sapaatit akunneri pingasut mattusimanissaq. Taamaasillutik Canadamiut nunanut allanut unammisartuisa katersuunniarnera ajornakusoorpoq nunamut allamukarlutik katersuunnianngikkunik, Kurt Lauritsen oqaluttuarpoq.
- USA-mi inuit katersuussinnaanerat aamma killilersorneqarpoq. Taakkuli nunanut allanut unammisartui nunani allani angalapput nunanut allanut unammeqattaarlutik ilimanarluinnarporlu VM-mut anngunniunnermi peqataanissaat, Kurt Lauritsen oqarpoq.
AAMMA ATUARUK Tamaat isigalugu: Assammik arsarnermi, volleymi, taekwondomi pissartanngorniuttoqarnissaa suli neriuutigineqartoq
Kalaallit nunanut allanut unammisartut tamakkinngikkaluarlutii Nuummi katersuupput toqqakkat Kommuneqarfik Sermersuumeersut peqataaffigisaannik. Unammisartulli VM-mut anngunniuteqataasinnaanissamut sungiusarluarniarsaripput.
- Unammisartuutivut timimikkut sungiusarluarsimapput, USA-mulli sanilliutissagaanni unamminernik amigaateqarput tassami ilisimaneqartut Kalaallit Nunaanni pissartanngorniuttoqarnikuunngilaq, Kurt Lauritsen oqarpoq.
Nunat arlallit VM-mut anngunniuteqataasinnaanatik alunaarput. Cuba pikkorissunik unammisartoqaraluarluni peqataaniarunnaarpoq. Mexico aamma peqataassanngilaq. Nuna taanna coronamit ima eqqungaatigaaq OL-rtoqartillu unammisarfiutaat coronamut napparsimmaviliarineqarsimalluni.
- IHF eqqaaneqareersutut piumasaqarpoq VM-mut anngunniuttoqassasoq pissanganassaarlu nunat qassit peqataasinnaassanersut, Kurt Lauritsen naggasiivoq.
VM-mut anngunniunnermi kalaallit peqataaffigisassaanni inissaq ataaseq unammissutigineqassaaq.
Der spilles om en plads til VM-slutrunden i den nordlige del af den panamerikanske gruppe, hvor Grønland er med.
