Tamaat isigalugu: Assammik arsarnermi, volleymi, taekwondomi pissartanngorniuttoqarnissaa suli neriuutigineqartoq
Kalaallit Arsaattartut Kattuffiata nunatsinni isikkamik arsaannermi ukioq manna pissartanngorniuuttoqarnissaa ilimananngitsoq maannamut nalunaarutigaa.
Coronami pillugu malittarisassat pissartanngorniuttoqarnissaanut akornusiivoq. Namminersorlutik Oqartussaniimmi nalunaarut nutaaq naapertorlugu kommunimiit kommunimut allamut angalalluni aaqqissuussinernut peqataanissamik nalunaarfigineqartussanut angalasoqaqqusaanngilaq.
AAMMA ATUARUK Naalakkersuisoq pissartanngorniunnissaq pillugu: KAK-p kissaatai akuerisinnaangilagut
Illup iluani timersuutini soorlu assammik arsarnermi, taekwondomi, sulorarnermi, volleyballimi pissartanngorniuttoqassanersoq suli aalajangerneqanngilaq – taakkumi aaqqissuunneqarsinnaanissaat suli neriuutigineqarpoq.
Katerisimaarnermut malittarisassat
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Assammik arsarneq
Timersoqatigiit Assammik Arsartartut Kattuffiata, TAAK-ip nunatsinni assammik arsarnermi upernaaq pissartanngorniuttoqarnissaa kinguartinnikuuaa. Tamanna poorskip nalaani ingerlanneqartussaagaluarpoq.
Pissartanngorniuttoqarnissaanut Naalakkersuisut killilersuinernik qasukkaanissaat apeqqutaasoq, TAAK-ip siulittaasua, Jørgen Isak Olsen oqarpoq.
- Neriuuteqarpugut suli. Taannalu neriuuterput malinnaaffigissavarput. Pisinnaatitsilertoqarpat qujassaagut. Kisianni pisinnaanngippat GM-ernissat kinguartinneqarumaarput imaluunniit unitsinneqarlutik.
AAMMA ATUARUK Timersoqatigiit kattuffiat pissartanngorniuttoqarnissaanut kimigiiseqataalersoq
Neriuuteqarnerilli killissaqarput, Jørgen Isak Olsenillu oqarnera naapertorlugu septembarertinnagu ersarissumik nalunaaruteqartoqaruni pitsaanerpaassaaq.
- Pisortat tusarniarnerusariaqarput timersoqatigiiffiit kattuffiannut, neriuuteqarpunga suli pisortat tusarniarnerulernissaat piffissami aggersumi.
Volleyball
Volleyboldertartut aamma taama inissisimapput.
Kalaallit Volleyballertartuisa Kattuffiata, KVK pissartanngorniutsinissatik ukiamut ingerlanniarniarpaat.
- Oktoberimi inersimasut GM-ernissaat anguniarlugu Naalakkersuisunut qinnuteqaraluassaagut, KVK siulittaasua, Aalipaaraq Kreutzmann oqarpoq.
Taekwondo
Taekwondortartut kattuffiat, GTF pissartanngorniuttoqarnissaanut atatillugu aamma utaqqimaartoq ilagaat.
GTF-ip siulittaasuata, Vivi G. Lennertip kattuffiup utaqqinissartik aggustip ulluisa 7-iannut killileraa oqaatigaa.
- Tassa soorunami neriukkaluarpugut, oktobarimi uge 42-mi Qaqortumi ingerlanneqarsinnaasoq. Kisianni maannakkumut nunatsinni pissutsinut killiffik eqqarsaatigalugu iluarpallaanngilaq.
Taassuma ukioq manna pissartanngortanngorniuttoqassanngissoraa, aalajangiisoqartariaqaliivimmammi. Siulersuisulli pissutsinik ingerlaavartumik nalilersuissasut oqaatigaa.
Sulorarneq
Sulorartartut kattuffiata poorskikkunni pissartanngorniuttoqarnissaralua aamma kinguartinnikuuaa.
Pissartanngorniunnerit ukiaru ingerlanneqarsinnaanissaat kattuffiup neriuutigaa.
- Innersuussutit avaqqullugit aaqqissuussisinnaanngilagut. Kisianni neriuppugulli arlaatigut aaqqiisoqarsinnaassasoq, nunatsinni sulorartartut kattuffiata siulittaasua, Michael Kleist oqarpoq.
Arctic Sports Greenland
Arctic Sports Greenland inuit kalaallillu pinnguaataannik aaqqissuussisartartoq misileerusuppallaanngilaq.
Ukioq manna pissartanngorniunneq Ilulissani siusinnerusukkut aaqqissuunneqartussaagaluarpoq, ukiamulli kinguartinneqarluni. Killilersuinerilli maannakkut atuuttut pissutigalugit aaqqissuussinissaq kattuffiup taamaatiinnaraa: siulittaasoq, Bolethe Stenskov oqarpoq:
- Kisianni peqqussutit allanngorteqqinneqassappata nalilersuisoqaqqissinnaasoq siulersuisuninngaanniit. Una uagut unammersuariaaserput illup iluani silamilu ingerlanneqartaramik taavalu aamma assersuutigiinnarlugu unammersuaartut ataatsimoorlutik ineqatigiittarput soorlu festisalini ilaatigut uffarfeqnngitsuni, Bolethe Stenskov oqarpoq, nangillunilu:
AAMMA ATUARUK Klubbit pissartanngorniuttoqannginnissaa uggorigaat: Asuliinnaq unammillissuteqarpugut
- Tamakkua aamma tamaasa eqqarsaatigisariaqaramik, soorunami aaqqissuineq toqqissisimanarnerpaamik aammalu peqqissutsitsinnut mianersussagutta tamakkua isigisariaqartaratsigit.
Taassuma nunatsinni illoqarfinni kattuffiit sumiiffigisaminni unammiuaarnernik aaqqissuussiinnarnissaat kaammattuutigaa.
Sisoraaserluni ujakkaarnermi sangusaarnermilu pissartanngorniuunneq
Sisoraatit aamma uninngatiinnarneqassapput.
Nunatsinni sisorartartut kattuffianni, GSKIF-imi siulittaasup ujakkaarnermi sangusaarnermilu nunatsinni pissartanngorniuttoqarnissaa aamma pilersaarutiginngilaa. Poorskikkut aallartinneranni pissartanngorniuttoqartussaagaluarpoq, tamannali taamaatiinnarneqarluni.
- Kisianni aamma tassa qaavatigut Arctic Winter Gamesimi aamma eqqugaavugut, aammalu danmarksmesterskabimut unammiarnissaraluit tamarmik, siulittaasoq, Timooq Mølgaard oqarpoq.
Kajaq
Qaannat Kattuffiata pissartanngorniuttoqarnissaa maajimi taamaatiinnarpaa.
Nunatsinni pissartanngorniunnerit Ilulissani juulimi ingerlanneqartussaagaluarput. Tamanna aappaagumut kinguartinneqarnikuuvoq, Qaannat Kattuffianni siulittaasoq, Elias Inuusuttoq oqarpoq.
Qajartortartut 180-it missaanniittut pissartanngorniuteqataasussaagaluarput.
