VM-mut anngunniunnermi Kalaallit Nunaat pingajussaa ajugaavoq

Kalaallit angutit assammik arsarlutik nunanut allanut unammisartui Cubamut pingasunngornermi ajorsareerlutik, Puertu Ricomut ippassaq unammigamik ajugaapput.

Allattoq Jaaku Lyberth

maajip 11-at 2024 14:57

Kalaallit angutit assammik arsarlutik nunanut allanut unammisartut Mexicomi VM-mut anngunniunnerminni pingajussaa ippassaq unnukkut ajugaapput.

Sapaatit akunnerata ingerlanerani kalaallit unammisartui pingasoriarlutik sakkortuunik unammereerlutik Puertu Rico-mut unammipput, sungiusaasullu Johannes Grothip arsartut pingaaruteqartut sipaarniarlugit aaliangersimasoq unamminermi pissangatitsipput.

Unamminermi immikkoortumi suillermi naligeeqalutik unammipput, Kalaallit Nunaat mål-imik ataatsimik siuaqqaannaaveriarlutik immikkoortup siulliup naammassiartornerani aatsaat Puerto Rico katakkiartorpaat.

Unamminerup imikkoortuani siullermi Kalaallit Nunaat 15-inik siuaqqavoq, Puerto Rico aqqanileraartoq.

Aamma atuarukAssammik arsartartut Cubamut ajorsartut

Unamminerup naammassinerani kalaallit 29-22 ajugaapput.

Angutit assammik arsarlutik nunanut allanut unammisartui USA-mut unnugu unammissapput.

Kalaallit arsartartui ajugaaniutivinnissamut anngutissagunik USA-mut ajugaasariaqarput, taava Mexico Cubamut unammiguni ajorsarpat kalaallit anngutissallutik.

Kalaallit USA-mut unamminerat KNR2-mi unnugu qulingiluanut tanneq aqqanermut isiginnaarneqarsinnaavoq.

Nutaarsiassami kukkunermik nassaarsimaguit uunga allaffigineqarsinnaavugut.