Assammik arsartartut Cubamut ajorsartut
Angutit assammik arsartartut nunanut allanut unammisartut nunarsuarmi aappaagu 2025-mi januaarimi pissartanngorniunnissamut anngunniunnermi Canadamut Mexicomullu unamminerni aallartilluarlutik ajugaariarlutik, pingajussaa unamminerminni Cubamut ajorsarput.
Assammik arsartartut aallartilluaraluarput, unammisut minutsit siulliit 15-it naligeeqalutik, pingaartumillu målmandiat Isak Olsen aallartilluarpoq, unamminerup aallartereernerani piffissap taassuma iluani Cubap pingasoriarluni isertitassaraluinik annaassilluni.
Unamminerulli immikkoortuata siulliani minutsit kingulliit 15-it Cuba siuariartulertorpoq, taamaasillutillu unamminerup immikkoortuata siulliup naammassinerani Cuba 21-12-imik siuaqqalluni.
Unammisut unamminerup immikkoortuata aappaani naligiittorujussuupput, kalaallillli arsartartui Cubamiut angusinnaanngilaat, Cubalu 35-26-nik ajugaalluni.
- Cubamiut anginerullutillu 5-10 kiilunik oqimaannerusut malunniutaasoq nalilerneqarsinnaavoq, Timersoqatigiit Assammik Arsartut Kattuffiat, TAAK, tusagassiorfinnut nalunaarummi allapput.
Minik Dahl Høegh kalaallini unammeqataasuni isertitsinerpaavoq, arfineq-pingasoriarluni isertitsilluni.
Angutit assammik arsartartut tulliani aqagu tallimanngornermi unammissapput, Puerto Ricomut tamatumuuna unammissallutik.
Unammineq nunatta nalunaaqutaa naapertorlugu unnnukkut nalunaaqutaq arfineq-marlunut aallartissaaq, aallakaatitsinerlu arfineq-marlunut tanneq qulinut aallartissaaq, KNR2-kkullu isiginnaarneqarsinnaassalluni.
