VM-imut anngunniunnissami pulje-mi artornartumiipput
Kalaallit unammisassaasa ilagaat kingullermik panamerikamiut pissartanngorniummata pissartaasut aamma normu 3-usut. 2013-mi Spaniami VM-qarnissaanut anngunninnerit qaammat tulleq pissapput. Nunali tamakkerlugu sungiusaasoq Niels Møller erseqqissaavoq kalaallit tunniutiinnareernianngivissut.
- Unammersuarnissanut pitsaasumik piareersarsimavugut. Assammik arsartartut kattuffiat GHF pisinnaasani tamaat ikiuuppoq aamma unammisussat takutitsilluarsinnaasutut upperilluinnakkakka toqqarsimavakka. Unammisassavut immaqa tupaallassapput VM-mut anngutissagutta kisianni anngusinnaanerput upperaarput. Pulje pikkunartussaavoq, kisianni tassa VM-mut anngunniarutta pulje-qativut pingasut ajorsartittariaqarpavut, Niels Møller siorna nuna tamakkerlugu sungiusaasunngortoq oqarpoq.
Amerika kujallermi nunat arlallit assammik arsarnermi siuarsaaleruttorput akissarsiutigalugu unammersuartitsisalernissaq anguniarlugu. Argentina, Brasilien aamma Chile ukiut kingulliit assut siuariarsimapput. Tasami Argentina sakkortunersaavoq aammali unammisagaat pikkorisseriarsimaqaat.
- Sungiusarnerit aqqusaakkavut unammisartunik isumallualersitsisimapput, tamannalu Argentinamukarutta iluaqutigissaqaarput. Sungiusaammik unammisarsimavugut aammalu ukiormanna GM-mi ukiuni siuliinit takulluarnarneruvoq. Aallartigata Danmarkimi katersuutissaagut taamaammat suli iluarseeriarnissamut piffissaqassaagut. Pulje-mi normu 2-nngorniarluta Chile aamma USA unammingaatsiartussaassavagut semifinalemullu anngussinnaanissarput upperaara, Niels Møller oqarpoq, unammisartunik Danmarkimi, Sverige-mi Nunatsinnilu najugalinnik toqqartuisimasoq.
Unamisussatut toqqarneqartut Nunatsinni najugallit tamatumuuna amerlanerupput ukiuni siuliini Danmarkimi najugallit toqqarneqarnerusarsimagaluartut. Tassuuna erserpoq Nunatsinni klubbit ukiuni kingullerni sulilluarnerulersimasut unammiartortussallu Nunatsinneersut taamat amerlatiginerat Nunatsinni klubbit sulilluarnerisa kinguneraa.
- Kalaallit Nunaanni unammisartut arfineq pingasut toqqarsimavavakka. Taakku pikkorinnerpaaffissartik aatsaat angusussaavaat tullianik ukiut sisamat qaangiuppata VM-mut annguterialierutta. Taakku peqataanerisigut qulakkiissavarput Kalaallit Nunaanni najugaqarlutik unammisartut misilittagaqarlualernissaat kingusinnerusukkut nunanut allanut nallersuussinnaalernissamut iluaqutaasussamik. Piukkunnartut inerisarnerat pingaartorujussuuvoq, toqqagaasullu aatsaat piukkunnassuseqaramik toqqarneqarput. Maanna suliassarput pingaarneq tassaavqq Panamerikamiut pissartanngorniunneranni pikkorinnerit pingasut akornannut inissinnissarput taamaasilluta VM-mut anngunniassagatta, Niels Møller oqarpoq. Unammisartullu Danmarkimi sungiusaammik unammissapput maajip 29-at unammiartortussallu juuni aqqaneq aappaat katersuuteqqissapput ullut pingasut qaangiunneranni Amerika kujallermut aallassallutik.
Aajuku gruppet
Gruppe A:
Argentina
Chile
Grønland
USA
Venezuela
Gruppe B:
Brasilien
Uruguay
Dominikanske Republik
Mexico
Paraguay
