Assammik arsarneq: VM-eqataarngaarnermi uummatit attoraat

- Oqaatigerusuppara nunarsuarmi pissartanngunngikkaluarluta isiginnaartuginnersaasugut.

Oqaatsit taakku aninneqarput assammik arsarnermi Savalimmiormiut anføreriannit Pernille Brandenborgimit Tysklandimi maanna VM-qataareerlutik ilinilu angerlamut apuussimalernerminni.

VM-imi siullerpaamik peqataanermi misigisat isumaliutigineqarput. Nunarsuarmi pissartanngorniunnermi nunanit peqataasunit 32-usunit Savalimmiormiut pikkorinnerit 20-t akornannut inissipput. Assammik arsarnermi nunarsuarmi kattuffissuaq IHF Savalimmiormiut peqataanerannut oqaaseqarnermini allappoq atlantikup avannaamiut peqataanerminni uummatit attoraat. 

Unamminermi siullermi Montenegro ajorsarfigaat nunali taanna assammik arsarnermi pissaanilissuat unammillerluaqattaarlugu. Nunani tamalaani allaaserineqarnerujussuat pivoq Spania nunarsuarmi pissartanngorniunnerni siornatigut sølvinnallunilu bronzennareersoq unammereeraallu. Unamminermi naligiiffioqisumi Savalimmiormiut 27-25-mik ajugaapput.

- Isumaqarpunga unammersuarnermi uani peqataanermi taanna eqqaamasama pikkunarnersarissaagat. Angusaq tupinnaannartumik angivoq, Pernille Brandenborg KNR-imut oqarpoq.

- Ullut marluk sioqqullugit Montenegro unammigatsigu misigisimavunga arsarluarluta taamaattorli siornatigut misigisariikkatsitut periarfissanik atorluaanngippallaarluta. Taamaattumik aatsaat aappassaa unamminermi Spaniamut taamatut angusaarpugut; tamanna aamma neriuutigereerparput nalunaguli ajornakusuussaqisoq. Taamaammat pisoq angisoorujussuuvoq assullu oqiliallannarluni tamanna sapernagu takutikkatsigu, Pernille Brandenborg oqarpoq.

Kvartfinale angungajappaat

Savalimmiormiut kvartfinalemut anngussinnaanissamut måli ataasinnguaq amigaatigiinnarpaat taamalu pisoqarsimasuupput VM-imi tupinnartuliaq angisimassagaluarpoq. Tamatumunngali ajugaanissaq pisariaqartippaat. Naligiiginnarpulli. Unamminermi kingullermi aamma Island ukiaq ajugaaffigereeraluarlugu ajorsarfigaat.

Taamaakkaluartoq Savalimmiormiut oqallisaaqaat. Maluginiarneqartullu ilagaat arsartut arlallit 20-t missaannaannik ukioqartut misilittagartunerusut soorlu Pernille Brandenborgikkut peqatigalugit takutitsilluaqattaarmata.

- Isumaqarpunga tulluusimaarutissaqartorujussuulluta. Eqqarsaatigiinnarlugu kvartfinalemut anngunissamut periarfissaqaleraluarnerput ingasavippoq. Ataatsimut isigalugu kvartfinalemut anngussinnaanissaq pillugu unammisimanerput tulluusimaarutissaavoq angisooq, Pernille Brandenborg oqarpoq.

Savalimmiormiut Europami siorna pissartanngorniunneri peqataasut VM-eqataanerminni uummatit attorpaat.

- Iligisakka tulluusimaarutigeqaakka. Uanga aamma VM-imi peqataanikuunngilanga Champions Leaguemi unammeqataaneq misiginikuugaluarlugu. Unammeqatitta ilaat Savalimmiuni pikkorinnerni unammisuupput ilaallu Danmarkimi 1. divisionimi iligiinnut ilanngunniarlutik tamaviaarlutik. Tamanna eqqarsaatigalugu qaffasissorujussuarmik takutitsiput, Pernille Brandeborg Norgemi pikkorinnerni unammisartuusoq oqarpoq.

Isiginnaartutsialaat

- Neriuppunga takutitavut maluginiarneqartut inuusunnerillu misileerusuppata nutaanik unammilligassinneqarumaartut. Siunissaq qaamasutut isigaara, Savalimmiormiut anføreriat oqarpoq.

Savalimmiormiut unammisartut peqatigiiffinnut tunulequtigisaminnut adventip sapaataasa aappaanni uterput. Taamatuttaaq isiginnaariartut ingerlalluarfinni ajornartorsiornernilu tapersersuilluaqisut angerlarput.

- Taakku isiginnaartoralugit allaanngilaq arlaatigut arsartutta ilaat. Timikkut tamaviaartitaaqaagut pissangasortaqarlutalu. Taamaattumik taamatut tapersorneqarnitsigut taama qaffasitsigisumik takutitsisinnaanissamut nukissaqalerpugut. Isiginnaariarlutik angalaqataasunut qujaniarneq naammagunanngilarluunnit nukissatsinnik tuniorarluaqimmatigut, Pernille Brandenborg oqarpoq.