Vivian Motzfeldt taaguunneqannginnerpaasoq: Politikki tassa taamaappoq
Kim Kielsen nunatsinni partiimi annerpaami ukiuni arfinilinni siulittaasooreerluni Nuummi Hotel Hans Egedemi ippassaq ataatsimeersuarnermi siulittaasuujunnaarpoq.
Siulittaasunngorniunnermi qineqqusaareerlutik aappassaanillu taasisoqareersoq Kielsen Erik Jensenimut ajorsarpoq.
Vivian Motzfeldt siulittaasussatut sassartut pingajoraat, taassumalu Kim Kielsen Erik Jensenilu siulittaasumut qineqqusaaqatigalugit. Taamaakkaluartorli Erik Jensen peqatigalugu partiimi siuariarpoq – taannami siulittaasup politikkikkut tullersortissaatut toqqarneqarpoq.
AAMMA ATUARUK Erik Jensen Siumumi siulittaasunngortoq
Vivian Motzfeldtip ajorsarnini ajuusaarutigaa, nutaamili atuuffimmiilernissaminut qilanaarluni.
- Tassa oqaatigivara politikki taamaappoq. Aamma timersorneq taamaappoq, sapaatiummat taasiunerup kingorna KNR-imit apersorneqarami oqarpoq.
- Ajorsarnera ataqqivara. Suleqataanera nangissavara. Nikalluutiginngilara nukissaqaqaanga suli.
- Suut tamarmik piffissaqartarput. Una piffissaq uannuusimanngilaq. Taamaattorlu alloriarnissamut massakkut tikkuussiffigineqartoq taanna naammagisimaarpara aamma siulittaasup tullissaatut qinigaavunga. Taamaammat suliassarpassuit tullinnguuttut utaqqiinnarput, aamma qilanaarpunga sulinerup nangeqqinneqarnissaanut.
Erik Jensenip siulittaasutut qinerneqarnerata kinguneratigut Erik Jensenip Vivian Motzfeldtillu Siumut erinarsutaasa ilaat qitikkaat.
Siulittaasumut ippassaq taasineq eqqissisimasumik ingerlanneqarpoq.
Taasinerit 71-it tamarmik sininneqarput. Taasinerillu pappiaqqamut allanneqartut karsimut pappimut issoraanneqarput.
Siulittaasussatut sassartut aqqi allaffissamut allattorneqarput, taasinerillu ataasiakkaarlugit karsimiit tiguneqartarlutik atuarneqarput, siulittaasunngorniartullu taaneqartup aqqata sanianut allanneqartarlutik.
Taasinermi siullermi Erik Jensen 35-nit, Kim Kielsen 29-nit Vivian Motzfeldtilu arfineq-marlunnit taaguunneqarput.
AAMMA ATUARUK Vivian Motzfeldt: Siulittaasunngussaguma tusarnaartuullungalu naaperiaasassaanga
Siumup malittarisassai naapertorlugit siulittaasunngortussaq 50 procentinit taaguunneqarsimassaaq. Partiip allattaa naapertorlugu Erik Jensen 49,3 procentinit taaguunneqarpoq taamaammallu siulittaasunngornissamut taasinermik ataatsimik amigaateqarluni.
Taamaammallu nutaamik taasisoqarnissaa pisariaqarluni, tassungalu taaneqannginnerpaaq ilaatinneqanngilaq. Tassanilu Vivian Motzfeldt peerneqarluni.
Siulittaasussamik qinerseqqinnissamut Erik Jensen Kim Kielsenilu kiserngorupput.
Taasisinnaatitaasut nutaamik taasiffissamik tunineqarput, nutaamillu taaseqqillutik.
Matumanilu Erik Jensen 39-nit taaguuneqartoq Kim Kielsen 32-nit taaguuneqarpoq.
