Vivian Motzfeldt Siumumi ilaasortaajunnaartoq

Vivian Motzfeldtip Siumup naalakkersuisoqatigiinni suleqataanerminit tallimanngormat aninerata kingunerisaanik partiini qimappaa.

Taassuma partii ukiut 20-t sinnerlugit ilaasortaaffigisani qimappaa.

- Siullertut taamatut sulerusunnginnama politikkikkut sulineq sunniuteqarsinnaanermiippoq, Vivian Motzfeldt oqarpoq.

Taassuma Siumup inatsisartuni gruppiani isumaqatiginninniartoqarsimannginnera akuerinagu ilanngullugu oqaatigaa.

- Partiip sulinerani siulersuisussamik soorunami toqqaasoqartarpoq uanili pingaarnerpaatut tikkuarusutara tassaavoq Siumup inatsisartuni gruppia tassaammat inuit qinigaat, siulersuisuunerit tassaapput ilaasortat toqqagaat. Tassani suleqatigiinneq qinikkat siulersuisuunerillu akornanni suleqatigiinneq annertoorujussuarmik innarlerneqarpoq, taanna oqarpoq.

Nunatta suli tatineqarnerani politikkikkut taama pisoqarnera uggornartoq, Vivian Motzfeldtip aamma oqaatigaa.

Aalajangernissaq ajornanngitsoq

Qinikkat qulaatiinnarlugit taama sulinerit aalajangiinerillu pisinnaanngitsut, taamaattumik partiimi ilaasortaaginnarnissani ilaasortaajunnaarnissaniluunniit apeqqusernagit ajornanngitsumik aalajangerpoq.

- Sooq sunniutaarutsilluta silataanut inissinneqarnissaq uanga naleqartitanni tarrarsorfigisinnaanngilara.

- Taamaammat aalajangernissara ajornarpallaanngilaq, Vivian Motzfeldt KNR-imit apersorneqarnermini oqarpoq.

Siumullu ukiorpassuarni anguniagai naleqartitaalu pimoorullugit sulisimanini massakkut inissisimaffimmi tassani sulinissamut tulluanngitsoq oqarpoq.

Sumiluunniit inissikkaluaruni suliassani nangeqqissagai

Naak Vivian Naalakkersuisuujunnaareeraluarluni, suliani allanngortinniarnagit aamma oqaatigaa.

- Suliat pingaartillugit suliffigisimasakka nanginnissaannut aporfissaqartinngilakka, kisianni oqareernittut nukissakka iluaqutaaffissanni pitsaanerpaamik atorusuppakka, Vivian Motzfeldt oqarpoq.

Iliuutsit aqqutillu eqqortut iluamik atorneqarsimannginneri pissutigalugit partiimiinnissaminut tulluanngitsoq taassuma ilanngullugu oqaatigaa.

Attaviitsutut suliniartoq

Inuiaqatigiinnit toqqarneqartut qulaatiinnarlugit aalajangiilluni sulinissaq taassuma tulluannginnerarpaa.

- Suleriaatsit taamaattut takorusunngilakka aamma peqataaffigerusunngilakka.

Siumut uterfigissamaarpiuk?

- Siumut qimappara, Vivian Motzfeldt KNR-imit aperineqarami taama akivoq.

Siumumiillu ullumikkut suleriaaserineqartut akuerinagit taamaammallu attaviitsuulluni sulinini massakkut ingerlatissallugu oqaatigaa.

- Maannamut attaviitsuullunga sulinera nangissavara partiit suliaminnik ingerlataqareersut iserfigiinnassallugit utoqqatsinaraara, Vivian Motzfeldt oqarpoq.

Vivian Motzfeldtip apersorneqarnera tamakkiisoq KNR-radiop aallakaatitassiaani Ulluni Makkunani-mi ualimut tallimanut qiteqquppat aallakaatinneqarnera tusaarnaarsinnaavat.

Siumup siulersuisuunerisa qujaffigigaat

Vivian Motzfeldtip Siumumit ilaasortaajunnaarneranut tunngatillugu Siumumi siulersuisuunerit qujassuteqarlutik tusagassiuutinut nalunaarummi allapput.

- Vivian ajunnginnerpaamik Siumup Siulersuisuunerisa kissaappaa atukkanilu tamani politikkikkut suleqatigiittarsimanitsigut ulluni oqinnerusuni oqimaannerusunilu suleqatigiittarsimanitsinnut qamannga pisumik qutsavigalugu, Siumumi siulersuisuunerit tusagassiuutinut nalunaarummi allapput.

Siumumit ilaasortaajunnaarluni nalunaaruteqarnera ataqqillugulu tusaatissatut tigugitsik Siumut siulersuisuuneri allapput.