Vivian Motzfeldt: Kuannersuit pillugit qinersisoqalernerani tusarniaatitsineq kukkunerujussuuvoq
Siumup Kuannersuarni aatsitassarsiornermut suliniut qinersisoqangajalernerani tusarniaassutigigamiuk akisunaarpaa.
Siumup siulittaasuata tullia, Vivian Motzfeldt, DR-ip radiokkut P1-ikkut aallakaatitassiaanut Orienteringimut qinersinerup aqaguani taama oqarpoq.
- Siullermik, Naalakkersuisuusimasut Kuannersuarnut suliniut kommuninut qinersisoqalernerani Inatsisartunullu qinersisoqalersinnaanerani tusarniaassuteqarnerat Siumumut akisoorujussuarmik kukkunerujussuusoq isumaqarpunga, Vivian Motzfeldt DR-imut oqarpoq.
AAMMA ATUARUK Naalakkersuisoq: Kuannersuarni seernartulinnik kinitsivik isumassarsiatsialaavoq
Taanna naapertorlugu Kommune Kujallermi qinersinerup inernera uppernarsaatini erseqqinnerpaavoq. Kujataani qinersinermi Inuit Ataqatigiit qinersisut 51 procentiinit taaguunneqartut, Siumut qinersisut 40 procentiinit taaguunneqarpoq.
- Kujataani nunap immikkoortuani takusinnaavarput, tassanimi Siumut maanna qinersinerup siuliani qinersisut 56 procentiinit taaguunneqarpoq. Taakku Inuit Ataqatigiinnik maanna taaguussipput, taamaattoqarneralu Kuannersuarnut apeqquterujussuaq kisimi pissutaasinnaavoq, Vivian Motzfeldt oqarpoq.
Kuannersuit pillugit isumaqatigiinnginneq
Demokraatit naalakkersuisoqatigiinnit tunuaramik qinersoqarnissaanullu tunngaviliillutik ilaatigut Siumup iluani Kuannersuarni aatsitassarsiornissaq pillugu isumaqatigiinnginneq tunngavilersuutigaat.
Vivian Motzfeldt aatsitassarsiornissamut suliniut pillugu innuttaasunut Kujataani ataatsimiititsinerit kinguartinneqarnissaannut kissaateqartunut taamani ilaavoq.
Coronavirusimut atatillugu killilersuisoqarnerani innuttaasunut ataatsimiititinissaq naapertuunngitsoq taanna ilaatigullu Kommune Kujallermi kommunalbestyrelsi isumaqarput.
Kalaallit Nunaanni aatsitassarsiorsinnaanissamut ammanini, Siumup siulittaasuata tulliata DR-imut oqaatigaa, aatsitassanullu inatsit naapertorlugu isummat nalilersuinerillu tamanut ammasumik tusarniaassutigineqartarnissaat tapersersorlugu.
Kuannersuarnili suliniut nammineq nangaanartoqartillugu erseqqissaatigaa:
- Eqqakkanik taama annertutigisunik tatsimi inissiiniartoqarnera tapersersorsinnaasimanngilara. Tamanna pillugu assigiinngitsunik isummersortoqarsimavoq, aamma partiitsinni,
AAMMA ATUARUK Immikkut ilisimasalik: Kuannersuit oqallisigineqarneranni Siumumi isumaqatigiinngingaatsiarnerit ersilerput
Siumup inatsisartuni maannamut ilaasortaatitani quliusut inatsisartunut ukioq manna qinersinermi attatiinnarpai. Kommune Kujallermili borgmesteriutitaqarnini Inuit Ataqatigiinnut tunniutiinnartariaqarsimavaat.
