Vittus: Sapinngilara

Inatsisartunili partiit taamaasa akuersitinniarnissaat ajornaatsuinnaassanngitsoq, Vittus Qujaukitsoq Qanoruumut ippassaq oqarpoq.

- Inatsisartuni partiit tallimaapput taakkulu tamaasa akuutinniarnissaat suliassarisussaavara, kisianni ajornaatsuinnaasussaanngilaq partiit taamaasa akuersitinniarnissaat, Vittus Qajaukitsoq oqarpoq.

Aamma atuaruk Qujaukitsup aningaasanut inatsisissaq iluatsinniassavaa

Aningaasaqarnermut naalakkersuisuuneq aatsaat misililinngilaa

Taanna 2013-mi marsip aqqaneq aappaanni Inatsisartunut qinersisoqarmat qiningaareernermi kingorna, aprilip tallimaanniit aningaasaqarnermut naalakkersuisunngorpoq. Tassalu ukioq taanna aallarnerfigalugu aningaasanut inatsisip Inatsisartuni akuersissutigineqarnissaa akisussaaffigilerlugu.

2014-mi aningaasanut inatsit 222 millioner koruuninik amigaartoorfiusoq, Vittus Qujaukitsup Inatsisartuni partiinut akuersissutigitippaa. Tamannalu puigorneqarsimanngitsoq, Partii Naleqqap siulittaasuata, Hans Enoksenip Qanoruumut oqaatigaa.

- Puigussanngilarput aningaasaqarnermut naalakkersuisuunermini torrallaanikuunngimmat. Allaat ilaatigut 300 millioner koruunit tungaanut amigartoortoqarnikuulluni, Hans Enoksen oqarpoq.

Aamma atuaruk Illuatungiliuttut: Naalakkersuisut amerlinerat torrallaanerunngilaq

Aningaasaqarnermut ippassaq naalakkersuisunngoqqittoq, Vittus Qujaukitsoq, Qanoruumit aperineqarpoq, aningaasaqarnermut tunngasoq suliassaq annertooq pitsaasumik kivissinnaaneraa, taannalu ima akivoq.

- Soorunami kivissinnaavara. Taamaaliorsimanavianngikkaluarpunga suliassaq uannut isaanneqarsimanngikkaluarpat aamma tatigineqarnera soorunami tulluusimaarutigaara.

Aningaasaqarnermut naalakkersuisoq, Vittus Qujaukitsoq oqarpoq.

Aamma atuaruk Naalakkersuisunngortut nutaat aajukua

Aningaasanut inatsit aappaagumoortoq Inatsisartuni oqallisigineqarluni pingajussaaneerneqassaaq novembarip 20-anni, tassa sapaatip akunneri marluk sinnilaarlugit qaangiuppta. Tamannalu pissutigalugu Vittus Qujaukitsup ulapigaatsiarnissani naatsorsuutigaa.

- Aningaasanut inatsisip akuerineqartussanngorlugu novembarip 20-annut killilerneqarsimasoq tusaatissatut tigullugu ulapigaatsiartariaqartussaassaagut tamassuma akuesissutigineqarnissaata tungaanut.

Aningaasaqarnermut aatsitassanullu naalakkersuisoq, Vittus Qujaukitsoq taama oqarpoq.

Aningaasanut inatsisissatut siunnersuut novembarip aqqarnganni aappassaaneerneqarluni oqallisigineqareerpat pingajussaaneerlugu oqallisigineqassaaq novembarip 20-anni.