Suliaq taanna innuttaasunut 6.628-nut, soraarnerussutisiaqalernissamut peqataasussaatitaanermi naammattunik akiliuteqarsimanngitsunut tunngavoq. Taamaammat Akileraartarnermut Aqutsisoqarfiup aningaasat amigaataasut akilertinniarlugit aallartippai. Toqqorsivimmit assiAssi: Ane-Marie Petersen / KNR

Vittus Qujaukitsup soraarnerussutisiassanik katersinngitsoorneq pillugu: Qulaajaasoqassaaq

Aningaasaqarnermut Naalakkersuisup, Vittus Qujaukitsup (NQ) soraarnerussutisiaqalernissamut aaqqissuussamut peqataasussaatitaanermi suliami kukkusoqarsimasoq nassuerutigaa.

- Qulaajaaneq massakkut ingerlatileruttorparput.

Aningaasaqarnermut naalakkersuisoq, Vittus Qujaukitsoq (NQ) nunatsinni politikkikkut isumasioqatigiinnermi siullerpaamik ammasuutitsinermi apersorneqartoq taama oqarpoq. 

Aningaasaqarnermut Akileraartarnermullu ataatsimiititaliaq soraarnerussutisiaqalernissamut aaqqissuussamut peqataasussaatitaanermut tunngatillugu apersuisuuvoq – ataatsimiititaliap apeqqutit 41-t isumasioqatigiinnermi apeqqutigai.

Suliaq naatsumik

- Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.

- Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniassammata taakku ukioq manna akileraaruteqarnerusariaqarput.

- Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.

- Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.

Suliamilu pitsanngorsaasoqarsinnaasoq, Vittus Qujaukitsup nassuerutigaa.

Akileraartarnermut Aqutsisoqarfik, kommunit, sulisitsisut, innuttaasunik nalunaarsuisarneq aningaasaqarnermullu naalakkersuisoqarfik tamarmik suliamut arlaatigut akuupput, suliamilu kukkusoqartoq, Qujaukitsup oqaatigaa.

- Taamaammat qulaajaasoqarluaqqissaarnissaa pisariaqarpoq, Vittus Qujaukitsoq oqarpoq.

6.628-t naammattumik akiliisimanngitsut

Suliaq taanna innuttaasunut 6.628-nut, soraarnerussutisiaqalernissamut peqataasussaatitaanermi naammattunik akiliuteqarsimanngitsunut tunngavoq. Taamaammat Akileraartarnermut Aqutsisoqarfiup aningaasat amigaataasut akilertinniarlugit aallartippai.

Soraarnerussutisiaqalernissamut peqataasussaatitaanermut aaqqissuussineq 2016-imi atuutilerpoq. Oqartussalli naammattunik paasissutissiisimannginnerarlugit isornartorsiorneqarput. Innuttaasut peqatigiiffiillu soraarnerussutisiaqalernissamut katersinngitsoortoqarneranut qaammarsaanissaat amigaataasimanerarpaat.

AAMMA ATUARUK IA: Siunersiuinermi apeqqutit akineqanngitsut amerlanerusut

Arlallimmi ajornartorsiutaasut pillugit paasissutissiisoqarsimanngissoraat, aatsaallu ukiortaami akileraartarnermut allagartat nassiussuunneqarnerisigut paasineqarlutik. 

- Qulaajaaneq massakkut ingerlatileruttorparput taavalu minnerunngitsumik paasititsiniaaneq inatsisip suut malitsiginerai tamakkiisumik taanna pikkoriffigisimanngikkipput taanna nassuerutigisariaqarpoq, taamaattumik innuttaasut inatsimmut tunngatillugu soraarnerussutisiassanut ileqqaaruteqartarneq taanna ilisimasariaqarpaat qanoruna sunniuteqassaaq, Vittus Qujaukitsoq oqarpoq.

Mamianaannarani ajunaarnersuartut taaneqarsinnaasoq

Inuit Ataqatigiit Partii Naleqqallu suliaq mamianaannarani ajunaarnersuartut taaneqarsinnaanerarpaat. Vittus Qujaukitsullu taama oqarnissaq sakkortugaa.

- Uivernaveersaarnissarput pisariaqarpoq naak innuttaasorparpassuit taamatut eqqornerlugaagaluartut kisianni eqqortumik toqqammaveqarluta aalajangersaasariaqarpugut, aammalu sunniuteqarnerlunnera taanna aaqqiiviginiarlugu isumaliortariaqassuugut, Qujaukitsoq oqarpoq.

- Ataaseq qulannaappoq. Siunissami utoqqaat amerliartortussat imminut pilersorsinnaanissamut pisussaaffik annikilliartornavianngilaq siunissami. Taamaattumik tamatsinnut pisussaaffiliisorujussuuvoq aamma oqitsuinnaanavianngitsoq takuneqarsinnaavoq, aningaasaqarnermut naalakkersuisoq oqarpoq.

Inatsit nutaaq atuutilinngikkallarmat innuttaasut 15.000-init amerlanerusut soraarnerussutisiaqalernissamut katersinngillat. Innuttaasut 9.000-it maanna katersilersimasut, Vittus Qujaukitsoq paasissutissiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat