Vittus: Qaasuitsup Kommunia avinneqassappat tamanna maanna pinavianngilaq

Nunamut namminermut Naalakkersuisoq, Vittus Qujaukitsoq taama oqarpoq, kisiannili taassuma erseqqissarpaa, kommunerujussuarmut ikaarsaarnermi suut pitsaaqutaanersut suullu ajoqutaasimanersut nalilersoqqaagassaassammata.
 
- Naalakkersuisunut pingaaruteqarpoq ersarissaatigissallugu, kommunip angissusaanut apeqqut siulliullugu sammineqassanngitsoq, kisiannili innuttaasut tamat oqartussaaqataanerisa aqqani, kommunerujussuarmut ikaarsaarsimanermi suut iluaqutaanersut, suut ajoqutaanersut suullu allanngortittariaqarnersut, Naalakkersuisunit nalilersuiffigineqaqqaartariaqarmata, Vittus Qujaukitsoq oqarpoq.
 
Qaasuitsup Kommuniani missigersuummik taasisitsineq ullaaq nalunaaqutaq quligiluanut aallartittoq ornigarneqarujussuanngilaq. Illoqarfinni aninginerni tassa Ilulissani Aasiannilu ullaaq quligiluanut taasiartortut ikittuaqqatut, taasisitsisunit nalilerneqarpoq. Tassa Ilulissani taasisinnaasut 3.295-iusut akornanni taamaallaat 114-nit ullaaq qulinngortorlu taasereersimapput Aasianni tassisinnaasut 2.363-iusut akornanni taamaalaat taasiartorsimallutik 83-it.
 
Nunamut Namminermut Naalakkersuisoq, Vittus Qujaukitsoq oqarpoq, taasinerup inernera qanorluunniit ikkaluarpat, ukiuni tulliuttuni marlunni Qaasuitsup Kommuniani allanngortoqarnavianngitsoq.
 
- Kommunit kattussuunneqarneranni suliaq, Naalakkersuisunit nalilersuiffigineqarnissaa aasamiit aallartinneqartussaavoq. Kommuninullu oqaloqatigiittarnigut toqqammavigalugit siulittuutigereernikuuvarput, kommunit kattussuunnerinut nalilersuinermi, ukiut tulliuttut marluk atorneqassasut. Taamaasilluta KANUKOKA peqatigalugu, kommunip angissusaanut apeqqut kingusinnerusukkut tikinneqarumaartoq naatsorsuutigaarput.
 
Nunamut Namminermut Naalakkersuisoq, Vittus Qujaukitsoq taama oqarpoq.