Visit Greenlandip umiarsuup aquttua danskeq isumaqatiginngilluinnarpaa
-Eqqortoq tassaavoq aningaasarsiutigalugu umiarsuarnik takornariartaatit 1980'ikkunni aallartimmatali ataasiarlunilluunniit toqumik kinguneqartumik ajutoortoqarsimannginnera. Isumannaallisaaneq ukiut tamaasa pitsanngorsarneqartuarpoq, aamma inatsisit nalunaarutilliu imaatigut angallannermi pissutsinut ingerlaavartumik naleqqussarneqartarput, siunnersortaaneq Malik Milfeldt oqarpoq, nangillunilu: Umiarsuit angisuut Qaqortumut, Nanortalimmut Nuummullu tikittarput, aamma Kalaallit Nunaanni imaatigut angalaffissatut killeqarfinni eqqussinissaq Imarsiornermut tunngasunik ataatsimiitsitaliap Imarsiornermullu aqutsisoqarfiup akornanni oqaloqatigiissutigaarput, umiarsuit anginerpaat imaata itissusaanik uuttortaavigineqarsimanngitsuni avannaani tunumilu angalannginnissaat siunissami pinngitsoortinniarlugu.
Arctic Umiaq Line tungaanit Bjarne Rasmussenip siooranartoqarneranik oqaaserisai isumaqatigineqanngillat.
- Imaatigut angallaneq sunaluunniit pinngortitaq ataqqillugu ingerlanneqartarpoq, aamma siku ilanngullugu. Kalaallit Nunaanni ukiuni tuusintilinni taamaaliortuarsimavugut, taamaammat pinngortitaq ataqqillugulu mianersuuttarparput. Kalaallit Nunaanni sikoqarnera soorunami mianersuutassaavoq, taamaammat aamma maani imaatigut angalassagaanni mianersuuttariaqarpoq, aamma umiarsuit assartuutit ilaasartaatillu atortorissaarutinik nutaaliaanerpaanik atortorissaarusersugaapput, aamma sikoqassusaa pillugu DMI-p sikunik nakkutilliisarfianit ingerlaavartumik nalunaarutinik pissarsisarput, Arctic Umiaq Linemi pisortaq Jette Larsen oqarpoq.
Imarsiornermut tunngasunik ataatsimiititaliami ilaasortat tassaapput - Visit Greenland –Kalaallit Nunanni politiit, Kalaallit Nunaanni Sulisitsisut, Grønlands Kommando, Attaveqarnermut Naalakkersuisoqarfik, Royal Arctic Line, Imarsiornermullu aqutsisoqarfik umiarsuuaatileqatigiffiillu kalaallit arlariit.
