Visit Greenland: Ukiup sinnera takornariartukissaaq
Coronamik tunillaassuuttoqalernerata takornariaqartitsineq takorloorneqarsinnaanngitsumut pisippaa, apeqqutit akissutissaqartinneqanngitsorpassuusimapput.
Nunatsinnut maannakkut oqartussanik timmisartuussisoqartarpoq. Tassa imaappoq corona pillugu allattoqarfiup nunatsinnut angalasussat tamarmik akuersissuteqarfigeqqaassavai – Air Greenlandilu aqqutigalugu pisarnertut billetsersisoqarsinnaanngilaq.
Nunatsinnulli aqqut pilersaarut malillugu apriilip ulluisa 18-ianni ammaqqittussaavoq.
NUnani allani akiuussutisserneqarsimanermut uppernarsaateqarnissaq oqaluuserineqalerpoq – assersuutigalugu Islandip angalasut akiuussutisserneqarsimasut tamarmik ammaassiffigai.
AAMMA ATUARUK Visit Greenland islandimiumik pisortartaartoq
Akiuussutisserneqarsimanermut uppernarsaammik atuilernissaq pillugu nunatsinni suli pilersaaruteqartoqanngilaq.
Tamatuma takornariaqarneq aamma Namminersorlutik Oqartussat nunatsinni takornariartitsinermi siunnersuisoqatigiivi ilungersunartumik inissippai.
- Akissutissanik arlalinnik amigaateqarpugut, takornariaqarnerup 2021-mi qanoq ingerlanissaanik takutitsisinnaasunik, maannakkorpiarlu akissutissanik peqartoqanngilaq, Visit Greenlandimi pisortaagallartoq, Mads-Daniel Skifte tusagassiuutinut nalunaarummi oqarpoq.
Taamaakkaluartorli takornariartitsinermi siunnersuisoqatigiit ukioq mannamut pisinnaasunik assigiinngitsunik pingasunik eqqoriaapput. Visit Greenlandimmi takornariarnermik suliaqartut pisinnaasut malillugit pilersaarusiorsinnaanissaat neriuutigaa.
Eqqoriaanerit pingasunut immikkoortunut tassa ”ajornerpaamik pisoqarfimmut” ”akunnattumik pisoqarfimmut” aamma ”ajunnginnerpaamik pisoqarfimmut” inissinneqarput.
Eqqoriaanerit pingasut Visit Greenlandip oqarnera naapertorlugu Namminersorlutik Oqartussani corona pillugu allattoqarfiup suleqatigineratigut suliarineqarput.
Ajornerpaamik pisoqarfik
Umiarsuarnik takornariartaatit: 2021-mi umiarsuarnik takornariaqarneq ammarneqanngitsoorpoq.
Inuit sapinngisamik amerlanerpaat julimi illersuummik kapitereersimappata Danmarkimiit/mut timmisartuussinerit nalinginnaasumik ammarneqassapput (sap. ak. arlallit tamanna kinguaattoorsinnaavoq). Angalasut tamarmik illersuummik kapineqarsimanerminnik uppernarsaammik pas-eqassapput.
Eqqoriaanerup ilimanassusaa 80%-mut inissinneqarpoq
Akunnattumik pisoqarfik
Umiarsuarnik takornariartaatit: Innuttaasut amerlanerpaartaat julimi (sap. ak. arlallit kingusinaarsinnaavoq) illersuummik kapitereersimappata umiarsuit takornariartaatit tikittalernissaannut ammaasoqassaaq. Ilaasut tamarmik illersuummik kapineqarsimanerminnik uppernarsaammik pas-eqassapput.
Inuit sapinngisamik amerlanerpaat julimi illersuummik kapitereersimappata Danmarkimiit/mut timmisartuussinerit nalinginnaasumik ammarneqassapput (sap. ak. arlallit tamanna kinguaattoorsinnaavoq). Angalasut tamarmik illersuummik kapineqarsimanerminnik uppernarsaammik pas-eqassapput akunnerillu 72 sioqqullugit misissorneqarsimanerminnit coronaqannginnermut akissummik pereersimassallutik.
Eqqoriaanerup ilimanassusaa 15%-mut inissinneqarpoq.
AAMMA ATUARUK Visit Greenland 2019-imi naammaginarpallaanngitsumik angusaqartoq
Ajunnginnerpaamik pisoqarfik
Umiarsuarnik takornariartaatit: 18. april 2021, tusarliussanut piffissarititaasoq qaangiuppat, umiarsuit takornariartaatit tikittalernissaannut ammaasoqassaaq. Ilaasut tamarmik illersuummik kapineqarsimanerminnik uppernarsaammik pas-eqassapput.
18. april 2021, tusarliussanut piffissarititaasoq qaangiuppat Danmarkimiit/mut timmisartuussinerit nalinginnaasut ammarneqassapput. Angalasut misissorneqarsimanerminnit coronaqannginnermut akissummik pinissap tungaanut mattusimanissaat piumasaqaataassaaq, Kalaallillu Nunaannut tikinnermiit ullut tallimat qaangiuppata misissorteqqissallutik.
Eqqoriaanerup ilimanassusaa 5%-mut inissinneqarpoq.