Visit Greenland islandimiumik pisortartaartoq
Julia Pars Visit Greenlandimi ukiuni pingasuni pisortaanioreerluni nutaanik unammilligassarsiorniarluni Namminersorlutik Oqartussat pigisaannit takornarialerivimmit soraarniarpoq. Taanna siorna novembarip ulluisa qulingiluaanni soraarniarpoq. Taassumalu pisortatut atuuffik apriilip ulluisa aallaqqaataata tungaanut atuuffigissavaa.
Visit Greenland tassunga paarlatsissamik maanna nassaarpoq. Islandimeersorlu, Hjörtur Smarason pisortanngussalluni.
Assi: Hjörtur Smarason / Visit Greenland.
- Hjörtur Smarason Copenhagen Business Schoolimi cand.merc.-itut ilinniagaqarpoq ukiorpassuarnilu misilittagaqarfigalugit branding aamma attaveqaqatigiinneq. Siusinnerusukkut suliarisimasaanut ilaapput Issittumi, Asiemi Afrikamilu attaveqaqatigiinnikkut periusissiorneq, takornariaqarnikkut inerisaaneq kiisalu ajornartorsiortoqartillugu aqutsineq.
Visit Greenland tusagassiuutinut nalunaarummi allappoq.
Coronap ilungersunartorsiortitsinera pingaarnerusoq
Hjörtur Smarasonip Visit Greenlandip 2021-2024-mut periusissiaa siuttuuffigissavaa, taanna nunatsinnut takornariaqarnerulersitsinissamut tunngavoq.
Periusissiarli siulleq coronap ilungersunartorsiortitsineranit aniguinissamut tungasoq, pisortanngortoq oqarpoq:
- Kalallit nunaanni takornarialerisut naapinnissaannut ineriartornermullu peqataanissannut assut qilanaarpunga. Kisianni siulliutitassarivara periusissiornissaq, tassani takornarialerinermi suliffeqarfiit coronap ajornartorsiortitsinera qaangiuteriarpat ingerlaqqinnissaannut iluaqutissaannik, Hjörtur Smarason oqarpoq.
AAMMA ATUARUK 2023-mut periusissiaq: Visit Greenlandip misigisassarsiortitsineq ukiorlu tamaat takornariaqartitsineq anguniarniarai
Visit Greenlandip siulittaasuata, Anette Grønkjær Lingsip pisortartaap tikilluaqqunissaa qilanaaraa, suliassarpassuaqartorlu taanna oqarpoq.
- Visit Greenlandip ulluni makkunani marlunnik immikkut pingaarutilinnik suliassaqarpoq; takornariaqarnerup aallarteqqinnissaa, tassanilu niuerfiit qaninnerpaat ukkatarineqarput kiisalu pilersaarut annertooq nunatta immikkut avammut nittarsaanneqarnissaanik tunaartaqartoq, taannalu nunatsinni angallannikkut periarfissat nutaat pilersinneqartussani kivitseqataasussaavoq.
- Pisortamik nutaamik ujaasinitsinni immikkut salliutissimavarput pisortap nutaap branding aamma takornariaqarnermik aallartisaanermik misilittagaqartuunissaa. Visit Greenlandimi sulisut suliaminnut immikkut ilisimasaqarlutillu tunniusimalluinnartuupput, tamannalu pingaaruteqarluinnarpoq, Hjörturimi immikkut ilisimasalinnik aqutsinissaminut ilisimasaqarluarmat, Anette Grønkjær Lings oqarpoq.