Visit Greenland 2019-imi naammaginarpallaanngitsumik angusaqartoq
Visit Greenland naapertorlugu iliuusissatut pilersaarummik allannguineq ernereernermilu sulinngiffeqarnermut aningaasartuutit siorna aningaasartornarsimapput.
Visit Greenlandimi 810.000 koruuninik amigartooruteqarluni ingerlatseqatigiiffimmi ileqquusumik ataatsimeersuarnermi nalunaarpoq.
- Visit Greenlandip 2019-imi ukimut angusai 810.000 koruuninik amigartooruteqarfiupput. Tamanna ingerlatseqatigiiffiup nittarsaassinermi saqqumilaarnermilu ineriartortitsinikkut 2019-imi ukioq naallugu ulapputeqarneranik peqquteqarpoq, Visit Greenland nalunaarpoq.
Ilimaginngisamik aningaasartuutit sulisumik naartusoqalersimappat suliffeqarfiup tamatumunnga aningaasartuuteqartariaqarneranut tunngasuusinnaapput.
Suliffeqarfik sulisumut naartusumut ernereernerani sulinngiffeqarneranut ullormusiaqartitsillunilu, taassumunnga paarlattaagallartumut akissarsisitsisussaavoq.
Coronavirusip ajornartoortitsineranik ukkassisoq
Nunatsinni ukioq manna takornariaqarnerunissaa neriuutaasimagaluarpoq. Coronavirusili ajornartoortitsimmat takornariat ikinnerussaqisut, suliffeqarfiup siulersuisuisa maanna naatsorsuutigisariaqalerpaat.
- Nunarsuarmi tamarmi takornariartisineq procentinik sisamanik-tallimanik 2030 tikillugu siuariaateqarfiussasoq, ukioq ataasiinnaq matuma siorna siulittuutigineqarpoq. COVID-19 siaruaatipilooriasaarmat siuariaateqarnissamik siulittuutigineqartut tamarmik qatangiinnarlutillu nunarsuarmi tamarmi takoriartitsineq ajalusoorluinnarpoq, Visit Greenlandip siulersuisuisa siulittaasuat, Anette G. Lings, oqarpoq.
Coronavirusi ajornartoortitsimmat siulersuisut nunatsinni takornariartitsinermik inuussutissarsiutilinnut iluaqutaasussamik nutaamik iliuusissatut pilersaarusiorput:
- Visit Greenlandip suliniutinik nunatsinni takornariartitsinermut uummarissaataasussanik patajaallisaaneq 2020-mi immikkut ukkatissavaa. Nunarsuarmi tamarmi pissutsit allanngorluinnarmata nunatsinni 2020-mi takornariartitsineq kinguariaateqarfiussaqisoq Visit Greenlandip ilimagaa, Anette G. Lings oqarpoq.
Ingerlatseqatigiiffiup aappaagu 350.000 koruuninik ukiumut angusaqassalluni naatsorsuutigaa.
