Visit Greenlandip pisortassani Katuami nassaarigaa
Kulturikkut illorsuarmi Katuami ukiuni kingullerni qulini pisortaasoq, Julia Pars, Visit Greenlandimi pisortanngussaaq.
Julia Parsip ukiuni kingullerni amerlasuuni suliffigisimasai takornariaqarnermut tunngassuteqarsimanngillat.
Julia misigisassaqartitsinissamut aqutsinermullu tunngasunik misilittagaqarpoq, Henley Business Schoolimit (Tuluit Nunaanni) MBA angusimavaa, kiisalu takornariaqarnermut atatillugu akademiøkonomitut ilinniagaqarluni. Julia 1992-ip 2007-uillu akornanni Kalaallit Nunaanni takornariaqarnikkut sunniuteqarsimavoq. Piffissami tassani Greenland Tourismimi assigiinngitsunik suliaqarsimalluni, soorlu aamma pisortaanermut tullersortaasimasoq, Nunatsinni takornariaqarnermi Siunnersuisoqatigiit tusagassiuutinut nalunaaruteqarlutik taama allapput.
AAMMA ATUARUK Tunumi takornariartitsisartut Destination East Greenland pisortartaarput
Julia Pars Ilulissani inunngorpoq, Nuummilu ukiuni kingullerni arlalinni najugaqarsimalluni.
Julia suliffigiligassamini takornarialerinerup imminut napatissinnaalernissaa anguniarlugu inuussutissarsiutip nunatsinni tamanut ukiorlu kaajallallugu inuussutissarsiutaalernissaata siammarneqarnissaa misilittariaqarnera pingaartuusorivaa, taamaalilluni Kalaallit Nunaanni takornarialerineq taamaallaat aasakkut qaammatit pingasuinnaanani ukioq naallugu suliassaasoq, Julia Pars tusagassiuutinut nalunaarummi taama oqarpoq.
Nunatsinni takornarialerisuni atorfiit pingaaruteqartut marluk sapaatip akunnerani uani nutaamik inuttalerneqarput.
Inatsisartuni ilaasortaq Iddimanngiuu Bianco takornariartitsivimmi Destination East Greenlandimi sapaatip akunnerani uani pisortatut atorfinitsinneqarpoq.
