Tunumi takornariartitsisartut Destination East Greenland pisortartaarput

- Iddimanngiiu Bianco Tasiilami inunngorlunilu peroriartorpoq, Tasiilallu eqqaalu ilisimaqarfigilluarlugu, soorlu aamma Inatsisartuni ilaasortaanermigut inuit amerlasuut attaveqarfigalugit, Destination East Greenlandimi pisortaagallartoq Rasmus Poulsen, tusagassiuutinut nalunaarummi taama ilaatigut allaaserisaqarpoq.

Iddimanngiiu Bianco, Inuit Ataqatigiit sinnerlugit Inatsisartuni ilaasortaanerminit, Inatsisartut ukiakkut ataatsimiinnerisa naammassineranni tunuassaaq, Destination East Greenlandimi sulinini taamaasilluni aallunniassagamiuk.

- Tamanna nuannaarutigaarput, Rasmus Poulsen ilaatigut allappoq, Tunumilu takornariartitsinermi nittarsaassisarnerup annertusarneqarnissaa aamma nuannaarutigalugu:

- Tunumiut inussiarnersuunerat, pinngortitap kulturillu nittarsaanneqarnerunissaat, Destination East Greenlandip siuttuuffigissavai, takornariartitsisut tusagassiuutinut nalunaarummi neriorsuutigaat.