Virusi pillugu ernumanerup umiarsuaq takornariartaat 6000-inik ilaasulik unittoortikkaa
Umiarsuarmi takornariartaami takornarianik 6000-inik ilaasoqartumi issimasut marluk coronavirusimik tunillatsissimasinnaanerat pasitsaanneqarmat umiarsuaq italiamiut illoqarfianni Civitavecchiami uninngatinneqarpoq.
- Kissarneqarneq, panertumik quersorneq ilaatigullu anernikilliorneq puallunnermullu takussutissaqarneq nappaammik tunillatsissimanerup ersiutigai.
- Inuit tunillatsinnerminnik ajornerulersut maannamut utoqqaanerullutillu peqqissutsikkut sanngiinnerusuupput.
- Nappaammut virusimut suli akiuussutissaqanngilaq. Ilisimatuut qassiiusut nappaammut akiuussutissamik ineriartortitsileruttorput. Ilisimatuullu akiuussutissaasinnaasup siulliup qaammatit pingasut missaat qaangiuppata misileraatigineqarsinnaalernissaa neriuutigaat.
- Kinami nappaalasut saniatigut Tysklandimi, Australiami, Frankrigimi, Japanimi, Malaysiami, Nepalimi, Canadami, Singaporemi, Korea Kujallermi, Taiwanimi, USA-mi, Saudi-Arabiami, Thailandimi, Cambodjami, Vietnamimi, Finlandimi Tibetimilu tunillatsissimasut siumorneqarput.
- Nunat qassiiusut nappaatip tuniluunnerata annikinnerulersinnaa pissutigalugu angalasut immikkut ittumik nakkutigilerpaat.
- Kinamiut illoqarfiat, Wuhan, nunallu immikkoortuani Hubei-imi illoqarfiit allat killilersorlugit matoqqatinneqarput. Innuttaasut 50 millioninit amerlanerusut killilersuinermit eqqugaaqqapput.
Pasitsaassaqarnerigaluarli taamatinneqarpoq. Napparsimasorineqartummi coronavirusimik tunillatsissimanngillat.
Takornariaqartaammi ilaasut kinamiut aappaariit coronaviruseqarsorineqaraluartut, inimi immikkut matoqqasumiitinneqarput.
Nutaarsiassaqartitsivik Ansa naapertorlugu arnaq kissarneqalersimavoq nualluummillu tunillatsissimasutut isikkoqarluni. Sillimanissarlu pissutigalugu ilaasut aappariit ineeqqami matoqqasumiitinneqarput.
Inuit 7700-it sinnerlugit coronavirusimik manna tunillatsissimapput.
AAMMA ATUARUK Kinami inuit coronavirusimik toqquteqartut 38-nik amerlisut
Umiarsuaq ”Costa Smeralda” Costa Crocieremit pigineqartoq ilaasunik sulisunillu 7000-ingajannik ilaasoqarpoq.
Umiarsuaq Italiap avannaanit Savonamit aallarpoq. Umiarsuup ingerlaarnermini Marseille, Barcelona aamma Palma de Mallorca aqqusaaqqaarlugit Civitavecchiamut apuuppoq.
