Kinami inuit coronavirusimik toqquteqartut 38-nik amerlisut
Nualluutip Coronavirusip Kinami tuniluunnerata kinguneranik inuit nappaammik taassuminnga toqquteqartut 38-nik amerlipput. Kinami inuit coronavirusimik toqquteqartut katillutik maanna 170-inngorput.
Kinami peqqinnissamut oqartussat sisamanngornermi taama ilisimatitsisut, nutaarsiassaqartitsiviup Reutersip allaaseraa.
Nualluutip sapaatit-akunnerit marluk matuma siornatigut siaruaatilerneranit akunnerit 24-it ingerlaneranni aatsaat taama amerlatigisut nappaammik taassuminnga toqquteqarput.
AAMMA ATUARUK SAS suspenderer fly til Kina på grund af virus
Tamatumalu saniatigut Kinami tunillanneqarsimasut 1700-nik amerlipput. Kinami inuit tunillanneqarsimasut taamaasillutik 7711-nngorput.
- Kissarneqarneq, panertumik quersorneq ilaatigullu anernikilliorneq, puallunnermullu takussutissaqarneq nappaammik tunillatsissimanerup ersiutigai.
- Inuit tunillatsinnerminnik ajornerulersut maannamut utoqqaanerullutillu peqqissutsikkut sanngiinnerusuupput.
- Nappaammut virusimut suli akiuussutissaqanngilaq. Ilisimatuut qassiiusut nappaammut akiuussutissamik ineriartortitsileruttorput. Ilisimatuullu akiuussutissaasinnaasup siulliup qaammatit pingasut missaat qaangiuppata misileraatigineqarsinnaalernissaa neriuutigaat.
- Kinami nappaalasut saniatigut Tysklandimi, Australiami, Frankrigimi, Japanimi, Malaysiami, Nepalimi, Canadami, Singaporemi, Korea Kujallermi, Taiwanimi, USA-mi, Saudi-Arabiami, Thailandimi, Cambodjami, Vietnamimi, Finlandimi Tibetimilu tunillatsissimasut siumorneqarput.
- Nunat qassiiusut nappaatip tuniluunnerata annikinnerulersinnaa pissutigalugu angalasut immikkut ittumik nakkutigilerpaat.
- Kinamiut illoqarfiat, Wuhan, nunallu immikkoortuani Hubei-imi illoqarfiit allat killilersorlugit matoqqatinneqarput. Innuttaasut 50 millioninit amerlanerusut killilersuinermit eqqugaaqqapput.
Inuit allat 12.000-it angullugit virusimik taassuminnga tunillanneqarsimassangatinneqarput. Kinami oqartussat taama ilisimatitsipput.
Coronavirusimut Kinami nunap immikkoortuani Heubeimi illoqarfimmi Wuhanimi 11 millioninik inulimmi uumasunik anngiortumik tuniniaavimmit siaruaassimassangatinneqartumut akiuussutissaqanngilaq.
Kinami nappaalasut saniatigut Tysklandimi, Australiami, Frankrigimi, Japanimi, Malaysiami, Nepalimi, Canadami, Singaporemi, Korea Kujallermi, Taiwanimi, USA-mi, Saudi-Arabiami, Thailandimi, Cambodjami Vietnamimi, Finlandimi Tibetimilu tunillatsissimasut siumorneqarput.
Angut qallunaaq Kinameereerluni angerlamut utermat coronavirusimik tunillatsissimanersoq paasiniarlugu marlunngornermi misissortippoq. Misissuinermili inernerit takutippaat angut qallunaaq tunillatsissimanngitsoq.
Nunat arlallit innuttaasutik Kinamiittut timmisartumik qimagussortippaat. Timmisartoq japanimiunik 200-t missaanniittunik issimasulik Wuhanimiit Tokyomut pingasunngornermi tikippoq.
AAMMA ATUARUK Frankrig timmisartumik europamiunik aallertussamik Kinamukartitsisoq
Qimagussortitaasuni pingasut coronavirusimik tunillatsissimasut, Japanip peqqissutsimut ministeriata sisamanngornermi nalunaarutigaa.
Amerikamiut 195-it USA-mit Hubeimiit aamma qimagussortinneqarput.
Amerikamiuni qimagussortinneqartuni arlaannaalluunniit tunillatsissimanermik ersiuteqanngillat. Reuters naapertorlugu Nancy Messonnier, USA-mi Nappaatinik Nakkutilliinermut Pitsaaliuinermullu Sullissivimmeersoq (CDC), taama ilisimatitsivoq.
Coronaviruseqarnermut ersiutaakkajuttut tassaapput kissarneqarneq, panertumik quersorneq, timminneq ilaatigullu anernikilliorneq.
Timmisartoq inunnik 200-ngajannik issimasulik Californiami sakkutooqarfiit ilaannut pingasunngornermi mippoq. Qimagussortinneqartut tunillatsissimanermut ersiuteqanngitsutut nalilerneqareeraluartut nalunaaquttap akunnerini 72-ini mattussaagallassapput.
