TV2-mi sulisut 16-it angerlarsimaffimminnit aneqqusaajunnaarallartut

Nutarterneqarpoq nal. 11.20: TV2-mi sulisut angerlarsimaffimminniiginnartussanngortinneqartut amerlassusaat pillugit paasissutissat saqqummiussat kingulliit najoqqutaralugit.

TV2-mi sulisut 16-it ulluni 14-ini angerlarsimaffimminniiginnartussanngortinneqapput. TV2-p nutaarsiassalerinermut pisortaa Mikkel Hertz taama ilisimatitsisoq tv-qarfiup nittartagaani allassimavoq.

Suleqataasa ilaata coronavirusimik tunillanneqarsimanera paasineqareersorlu taama pisoqarpoq.

Siusinnerusukkut nalunaarutigineqarpoq sulisut angerlasimaffimminniiginnartussanngortinneqartut arfiniliusut, taakkuali kingorna amerlillutik.

TV2-p Københavnimi Teglholmenimi sulisui, napparsimasut isumannaatsuunissaat pillugu aqutsioqarfiup peqataaffigisaanik, sisamanngornermi ataatsimiinnermut aggersarneqarput.

Sulisut ataasiakkaarlugit aqutsisoqarfimmit kingorna oqaloqatigineqarput, sulisup tunillanneqarsimasup suleqatini qanoq attaveqarfigisimanerai tassani paasiniarneqassalluni.

AAMMA ATUARUK TV2-mi sulisut ilaat coronavirusimik tunillanneqarsimasoq: Sulisut ernumasut

Sisamanngornermi oqaloqatigiinnerit suli naammassineqanngillat, sulisullu amerlanerusut tamanna pillugu angerlarsimaffimminniiginnartussanngortinneqarsinnaanerat naatsorsuutigineqartariaqartoq, nutaarsiassalerinermut pisortap oqaatigaa.

- Sulisut qassit angerlartinneqartariaqarnersut oqaloqatigiinnerit naammassineqareerpata aatsaat paasissavarput, Mikkel Hertz oqarpoq.

TV2-mi sulisoq Danmarkimi nualluummik coronavirusimik tunillanneqarsimasut siullersaraat.

Taanna ilaquttani ilagalugit maanna angerlarsimaffimminiiginnartussanngortinneqarpoq.