Vild med dans: Nukâka valsimik qitinnissaminut qilanaartoq

- Nuannaarpugut, eqqissisimaarpugut, piareeqqavugut qilanaarlutalu, Nukâka Coster-Waldau oqarpoq

Nukâka Coster-Waldau Silas Holstilu TV2-p aallakaatittagaani Vild Med Dansimi qitillutik allanut qitittunut unammeqqaaqqaarnissaminnut Danmarki ualisoq piareersaleruttorput.

- Tassa ajunngilluinnarpunga, piareeqqavunga qilanaarpugut. Kiisami. Sivisoorujussuarmik sungiusarnikuugatta, taavalu qitittariaatsit uku uanga sungiusimasanngisaannakkakka makku valsit iluasaarnartorujussuit, kisianni tassa takutinnissaannut piareerpugut, Nukâka Coster-Waldau oqarpoq. 

Nukâka sukataarpoq

Nukâka Coster-Waldau pinnersarteqqammisoq oqaluupparput, taassumalu valsimik qitinneq aallunnikuunngisaannaramiuk sungiusarnitik sakkortulaarsimasut oqarpoq.

- Inatsiseqarnermut, soorlu makkua assaga qanoq innissaa, qitiga, qungasera takitinniarlugu, qitera equtillugu, tamakku tamaasa allaasorujuupput, kisiat nuannersorujuuvoq. Silasilu aamma ilinniartitsisuullaqqittuugami nuannisarpugut.

Tamanna Silas Holstip isumaqatigaa, taanna Vild med Dansimi pingasoriarluni ajugaareernikuuvoq, siorna anguteqamminik illunnaaqarluni aamma ajugaanikuulluni. Maannalu kalaallimik qiteqateqartussanngorpoq.

- Nukâka sukataarpoq, pikkorillunilu. Siullermik aallarteqqaarnitsinniit maanna ingerlalluarneruvugut. Pikkorissipallaqaaq, pingaarnerpaarlu tassaavoq nuannisaqatigiinnerput, tamannalu iluarpoq, Silas Holst oqarpoq. 

Siornatigut marloriarluni aperitereersimasoq

Nukâka Coster-Waldau Vild med Dansimut peqataarusunnersoq siornatigut aperitittarnikuusimagaluarpoq, pingajussaanilli peqataarusunnerluni aperitikkami aatsaat akuersilluni.

- Aalajangerama nuannisarniarlunga, ilikkagaqarniarlunga. Utoqqaliniarlunga eqqaamasassarpassuaateqarlunga. Massakkut taava Vild Med Dans eqqaamasinnaassuara eqqartorlugu utoqqaliguma.

Vild med Dansimi unammisussat illunnaariit aqqaneq-marluupput, ukulu qitilerunik romantisk engelsk-vals, tassa asannippalaartumik tuluttut valsimik qitissamaarlutik nassuiaapput.

- Unammisussat tamaasa takunissaat qilanaaraara. Sungiusaateqaannarluta takunikuuvugut. Unnummuli tamatta atisarissaarlutalu nujarissaartussaavugut.

Vild med Dans siulleq Danmarkip nalunaaqutaa malillugu aallakaatinneqareerpoq, Nukaaka Silasilu ingerlaqqissimanersut oqaatigissanngilarput.

Vild med Dansili KNR kanaalikkut nalunaaqutaq qulingiluanut isiginnaarneqarsinnaavoq.