Video: Zakorat Zeeb nunanut allanut unammisartunut unippoq
Arsaattartoq Zakorat Zeeb Qeqertarsuarmi G-44-meersoq Ilulissani pissartanngorniuttoqarnerani seeqqumigut ajoquserpoq. Taamanikkut ujalorsuarnik kittorartoqanngilaq, maannali paasinarsivoq ajoqusernera ilimagisamit annertunerusoq.
- Pilatseqqaartariaqassaanga taamaakkaluartorli suli qularnarluni piariivissinnaanersunga. Namminersortunit tamanna suliarineqartussaavoq tassanilu aningaasartuutit nammineq akilertariaqassavakka, Zakorat Zeeb KNR.gl-mut oqarpoq.
Ukiuni arlalinni nunatsinni siukkat pikkorinnerit akornanniippoq aammalu nunanut allanut unammisartunngorsinnaasutut piukkussat atii ukiaq saqqummiunneqarmat piukkussat akornanniilluni. Taamaammat aasamut Island Gameseqarnissaanut peqataasinnaasut akornanniikkaluarpoq.
- Tusagaq nikalluallannarpoq. Inuttaa klubbialu eqqarsaatigalugit uggornarpoq. Neriuppunga arlaatigut ingerlariaqqiffissaqarsinnaajumaartoq, nuna tamakkerlugu sungiusaasoq Rene Olsen KNR.gl-mut oqarpoq.
Siukkaq taanna oqilagaluaqisoq meterit arlaqanngitsut arpalaaginnarluni seeqquni ippigilertarpaa. Taamaammat ilimanarluinnarpoq arsaattartuujunnaartariaqartoq.
Aasap ingerlanerani qatanngutini ilagalugit cd-mik saqqummersitseqataavoq imminnut 'Tulleriit'nik taallutik
- Arsaanneq unitsikkukku nipilersornermut periarfissaqarnerulissaanga, Zakorat Zeeb oqarpoq.
Aajuna video aasaq Zakorat Zeebip ajoquserneranit