Video: Thornstone nutaamik videoliorput
Neriunaatilittut Koda-mi 2011-mi akissarsitinneqartoq musikvideoliaminik nutaamik Youtube-mut ikkussivoq. Tassaavoq Thornstone-kkut nuusiaqqaavata "Been a figther"-ip video-rtaa.
Taanna aattaqarlunilu pissanganartuliaavoq. Tassaapput Thornstone-ikkut siuttuata Kuno Hammondip ilisarnaataasa ilaat tassa paquminarsinnaasut qaqilernissaat sapiiffigisaramiuk.
Taanna nunatsinni inuppassuit assiglaugit meeqqat inuusuttullu sumiginnarneqarnerannik takusaqartarsimavoq allaat ilaasa imminut toqunnissaq qimaaffigisarsimallugu.
- Uanga toqqissisimasumik meeraanikuuvunga angajoqqaannit assut asaneqarlunga. Kisianni sumiginnakkat amerlavallaat aamma takunikuuakka, Kuno Hammon Ilulissaneersoq oqarpoq.
- Erinarsuut una imaannaanngitsunik aqqusaagaqartaraluarlutik inuunermik ingerlatseqqittunut nersorinninniutaavoq, Kuno Hammond oqarpoq.
Musikvideo filmitut naatsutut suliaavoq isiginnaartup nammineq isummersorfigisinnaasaatut suliaalluni.
- Eqqumiitsuliortutut kiffaanngissuseq atorlugu suliaavoq. Nipilersortartorpassuit videoliortarput nipilersoqatigiit salliutillugit saqqumersinneqartarlutik. Uanili oqaluttuaq salliutipparput. Videop saqqummiunnissaa sivisuumik utaqqissimavarput isumaqarama peqataasut tamarmik piffissarujussuarmik atuisimanerminermut akissarsinngippata saqqummersinneqassanngitsoq, Kuno Hammond oqarpoq.
Videop suliarineranut Koda Gramex aningaasatigut tapiissuteqarsimavoq videollu immiunnera katiterneralu qaammat missaliorlugu suliaavoq.
Video ataani takusinnaavat.
Ilitsersuisoq/qullilersuisoq/assiliisoq: Gunberg Lange
Ilitsersuisoq/najoqqutassiortoq/katiterisoq: Kuno Hammond
Isiginnaartitseqataasut: Vivian Sandgreen, Kenneth Hegelund
Thornstone: Kuno Hammond, Ejner Groenvold, Miki Olsen, Inunngu Nielsen.
