VIDEO: Allaatit puusiat qineqqusaarutillu allagartaruit: Partiit qinersinissamut piareersartut

Politikkikkut partiit qanoq qineqqusaassanerlutik kikkullu qinersinernut pingasunut nunatsinni sapaatit akunneri arfinillit qaangiuppata qinersissutaasussanut qineqqusaassanersut suli paasiniarsarivaat.

Ussassaarutilli soorlu puusiat, allaatit tujuuluaqqallu piareeqqapput.

Kommunemut nunuaqarfinnullu aqutsisunut qinersisoqarnissaanut Siumumiit piareersaateqareerput. Siusinaartumik Inatsisartunut qinersisussanngornerput partiinut ulapaartitsilaarpoq.

- Ulapititsingaatsiassaaq soorunami, kisianni partiimi immikkoortortaqarfigut suliaqarlutik qangali aallartereerput. Taava una ilassutissatut Inatsisartunut qineqqusaarnissaq ilanngutissavarput, Bent Møller oqarpoq.

AAMMA ATUARUK Ulloq aalajangerneqarpoq: Apriilip ulluisa arfernat qinersissaagut

Atassut aamma piareersaateqarpoq.

- Aallartingaatsiareerpugut. Allaffik annertungaatsiamik suliaqarluni massakkut aallartippoq tamakkununnga piareersaatinut assigiinngitsunut sorpiaasanersut qulequttat taavalu suuniarpa Atassutip qulequtarisassai annerit, Atassummi siulittaasoq, Aqqalu C. Jerimiassen oqarpoq.

Inatsisartunut qinersisussanngorneq Qaqortumi Inuusuttut Ataqatigiiniit aamma piareersarneqalereerpoq.

- Qinerseriataalerneq tassa maannakkut piareersarfigilerparput. Kisianni sioqqullugu januaarimili kommunemut qinersinissaq taanna sulissutigileratsigu Inuusuttut Ataqatigiinninngaanniit, Inuusuttut Ataqatigiinni siulittaasoq, Lars Salik H. Kielsen oqarpoq.

Inatsisartunut, Kommunimut, nunaqarfiit aqutsisuinut ilagiillu sinniisaannut apriilip arferngani qinersissaagut.