Video: Boooom – Ilulissani mittarfissamut qaartitsineq siulleq

Nuummi mittarfissuassamut qaartiterinerit aallartinnikuupput. Qaqortumi mittarfiup sanaartornissaa qaqugu aallartinneqassanersoq suli pilersaarusiorneqanngilaq.

Ilulissani ippassaq siullermeertumik qaartitsisoqarpoq. Imaluunnit eqqornerusumik oqaatigalugu: Ilulissani mittarfissap sanaartornissaanut takussutissamik siullermeertumik qaartitsisoqarpoq.

Qaartitsineq takussutissaannaavoq, Munck Gruppenimmi suliami ilaanik Nuummilu sanaartukkaminik Ilulissanukaassinnginnerani sanaartornermik suliaqarneq apriilertinnagu aallartinnavianngilaq.

  • Nuummi nunanut allanut mittarfissap sanaartorneqarnera oktobarip 15-ianni aallartinneqarpoq.
  • Kalaallit Airportsip Nuummi Ilulissanilu mittarfiit 2023-p naajartornerani pisaarnissaat naatsorsuutigai.
  • Qaqortumi mittarfissaq 2023-mut aamma pilersaarutaavoq, aappaagulu sanaartornissamut suliariumannittussarsiuussisoqarnissaa naatsorsuutigineqarpoq.
  • Nuummi Ilulissanilu mittarfissuassat 2200 meterimik takissuseqassapput.
  • Qaqortumilu mittarfissaq 1500 meterimik takissuseqassalluni. 

Mittarfiup illutassaanik mittarfimmillu 2.200 meterimik takissuseqartumik sanaartortoqassaaq, mittarfiullu nutaap 2023-mi piariivinnissaa pilersaarutaavoq.

Naalakkersuisut siulittaasuat, Kim Kielsen qaartitsinissamut ippassaq toorseqataasuuvoq, taannalu oqarpoq:

- Tassa massakkut angallannikkut pissutsit allanngoriartulerput. Mittarfissat tassani naammassineqarpata, Nuummi, Ilulissani, Qaqortumilu annertuupilussuarmik allannguisoqassaaq angallannikkut, tassami uani aningaasarsiorfissat nutaat ammarartussaassapput, takornariaqarnermut tunngasut, kisianni aamma tamaanna uninnianngilagut, suluusalinnut mittarfeeqqat tassa taakkua tullinnguupput.

Illoqarfinni minnerni suluusalinnut mittarfiit ukiup ingerlanerani pilersaarusiorneqassapput – Qaqortumilu mittarfiup sanaartorneqarnissaa pilersaarutit annerit tulleraat.

AAMMA ATUARUK Avannaata Kommuniata qaartitsineq nuannaarutigigaa: Nunatsinnut tamarmut ulloq pingaaruteqarpoq

Qaqortumi qaqugu siullermik qaartitsisoqassanersoq suli pilersaarusiorneqanngilaq.

- Suliarinnittussarsiornissarli piariingajalerparput, sanaartugassanik suliassinneqartartunit upernaap naajartornerani neqeroorfigineqarnissarput naatsorsuutigaarput, Kalaallit Airportimi suliniutinut pisortap tullersortaa, Aviaaja Karlshøj Knudsen oqarpoq.

- Sanaartugassanik suliassinneqartartumik Qaqortumi aasamit suliaqalersinnaasussamik toqqaasoqarnissaa pilersaarutaavoq, suliniutinut pisortap tullia oqarpoq.

Kim Kielsenip Lars Løkke Rasmussenillu danskit Nuummi Ilulissanilu mittarfiit tallilerneqarnissaannut aningaasaleeqataanissaat siorna marsip qaammataani isumaqatigiissutigaat.

Isumaqatigiissuteqarnermi Danmark mittarfinnut pilersaarutinut 700 millionit koruuninik aningaasaliilluni Kalaallit Airports International A/S-imik 33 procentimik piginneqataalerpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat