Video: Anorisaatinik qangatasunik misileraaneq
Anorisaatit Alaskami siornatigut atorneqarsimapput, anorisaatilli portusoorsuarnik napasuliartallit sanaartornissaat ajornartorsiutigineqartupilussuusimavoq.
Alaskali maanna anorisaammik nutaarluinnartumik misileraanissamut 5 mio. kr.-inik aningaasaliissuteqarpoq.
Tassalu anorisaat qangatasoq, ballonerujussuaq nigalerujussuartut ilusilik anorisaatitaalu qeqqanut ikkullugu.
Anorisaat sumiiffinnut anorlernerpaaffiusunut sukkasuumik nuunneqarsinnaavoq. Aamma nunamiikkaluarluni innaallagialiortarpoq.
Anorisaat qangataleraangami kabelikkut nunamut atassuteqarfimmigut innaallagiaq nunamut ingerlatittarpaa.
Anorisaat nukissiorfimmit Altaeros Energiesimit sananeqartoq, innaallagissamik atuiffiusussamut ajornanngitsuaqqamik nuunneqarsinnaavoq.
Anorisaat Alaskami upernaaru misilittarneqassaaq, anorisaatillu taakku nutaat issittumi atorneqarsinnaanersut naliliiffigineqarumaarluni.
Anorisaat qangatasoq qanoq isikkoqarnersoq nittartakkami altaerosenergies.com takuneqarsinnaavoq.