VHF-ip inugaaniinneq ulorianarsinnaavoq
Angallat nuannaariut Ilulissat eqqaanni Eqip Sermiata sioraani malissuarnit ajutoortitaangajavippoq. Navialinerallu minnerulinngilaq angallavik taanna VHFip inugaaniimmat. Pissutsit taamaannerat politiit ernumanartoqartippaat.
Ilulissani politiit sapaatip akunnerata naanerani kaleqqinneqarput umiatsiaaraq ammaannartoq Uummannap eqqaani Niaqornaniit Ilulissiartoq tikissimanngitsoq. Ataataq panialu umiatsiaaqqamiittut Nuussuarmi sapernguffissarsisimapput, sapernguffialli VHF-ikkut attaveqarfiusinnaanngilaq.
- Uani pisumi annerusumik iliuuseqanngilagut kalerrinneqaratta angallatip allap attaveqarfigisimagai, Ilulissani politeeqarfimmi ulluinnarni aqutsisoq Karl Vinther oqarpoq.
Saperngusoqarneranili angallat alla attavigisimanngitsuuppassuk timmisartumik immaqalu politiit angallataanik ujaasisoqarsimasinnaagaluarpoq.
Sumiiffinni arlalinni VHF radiop attaveqannginnera politiit ernumanartoqartippaat. Tassami inuit inuunerminnik ulorianartorsiorlutik navialinerminni allanut attaveqarsinnaanngikkunik ajornartorsiulivittussaapput.
- Uummannap Ilulissallu akornanni angallattoqangaatsiarpoq. Aamma Alluttumi sumiiffiit arlallit VHF-mut attaveqarfiunngillat. Tamakku ilagaat Eqip sermiata eqqaa ukiut tamaasa takornariarpassuarnit alutorsariartorfigineqartartoq, Karl Vinther ernumaammersimalluni oqarpoq.
VHFip atorsinnaanngiffiani taartissatuaa isumannaatsoq tassaavoq oqarasuaat satellitimoortoq. Tamakku ilagaat Iridium nunarsuaq tamakkerlugu atorsinnaasoq. Taanna assigiinngitsunik pissarsiassaavoq ilaat 10.000 koruuninik akeqarlutik.
- Nalunngikkarluarpara piginissaat akisoqisoq. Kisianni aningaasaliinerussaaq pitsaasoq isumannaatsumik angalanissaq pineqartillugu, Karl Vinther oqarpoq.
