Nunat Avannarliit Killiit Siunnersoqatigiivi ukiumoortumik ataatsimiittut

Islandimit, Savalimmiunit Kalaallit Nunaanniillu sinniisut peqataapput ukioq manna qulequtarineqarpoq Nunat Avannarliit Killiit imarlu.

Nunat Avannarliit Killiit Siunnersuisoqatigiivi nunanit avannarlernit killernit Islandimit, Savalimmiunit Kalaallit Nunaannillu pilersinneqarpoq, nunat avannarliit killiit soqutigisaat pillugit sulinermi suleqatigiinnissaq siunertaralugu.

Naalakkersuisut sinnerlugit Ilinniartitaanermut, Ilageeqarnermut, Kultureqarnermut Nunanullu allanut Naalakkersuisoq Ane Lone Bagger peqataavoq. Islandimit peqataavoq Islandip Aalisarnermut Nunalerinermullu ministeria Kristján Þór Júlíusson, islandimiut nunanut allanut ministeriat Guðlaugur Þór Þórðarson sinnerlugu peqataasoq.

Peqataasullu qulequtarineqartoq pillugu oqalugiarnissamut aggersarneqarput.

Naalakkersuisup, Ane Lone Baggerip oqalugiarnermini ilaatigut erseqqissarpaa nunat avannarliit killiit suleqatigiissutigisinnaasaminnik nutaanik ujaasinissaq pingaaruteqartoq. Tassani ataatsimoorlutik plastikkinik mingutsitsineq piniutinillu annaasat maangaannartinneqartartullu annikillisarnissaanut suliniuteqarnissaq.

- Suleqatigiinneq oqaloqatigiinnerlu pingaaruteqarput. Nuannaarutigaaralu Nunat Avannarliit Killiit ukiumoortumik ataatsimiinneranni tikeraartitsisuusinnaagatta, tassuunalu Islandimit Savalimmiunit Kalaallit Nunaanniillu inatsisiliortunik naapitsinissamut periarfissaqartinneqarluta, Ane Lone bagger oqarpoq.

Siunnersuisoqatigiit inatsisartunit nunanit taakkunannga pingasuusunit ilaasortaqarput, ukiullu tamaasa ukiumoortumik ataatsimiittarlutik.

Naalakkersuisup tikkuarpaa nunat avannarliit killiit Kalaallit Nunaannitullu piniutinik annaasanik annaasaqartarnerup annertuumik ajornartorsiutigigaat. Piniutit aalisakkanik pisaqartuarput, tamatumalu kinguneraa aalisakkat mikinerulernerat. Taassuma saniatigut piniutit arriitsuararsuarmik arrortikkiartorneqartarput, naggataatigullu plastikkitut tappiorannartutut siammartertarput imaani avatangiisinut uumassuseqarnermullu mingutsitsisuullutik.

Taamaattumik Naalakkersuisup ersarissarpaa, ”Nunat Avannarliit Killiit suleqatigiinnerisigut annertunerusumik paasisimasaqalersissavaatigut, tassuunalu unammilligassanut tamatsinnut attuisuusunut ataatsimut aaqqiissutissanik nassaarniaqatigiisissinnaalluta”. Ane Lone Bagger oqalugiaammini naggasiivoq;

- Suleqatigiinneq oqaloqatigiinnerlu pingaaruteqarput. Nuannaarutigaara Nunat Avannarliit Killiit ukiumoortumik ataatsimiinneranni tikeraartitsisuusinnaagatta, tassuunalu Islandimit Savalimmiunit Kalaallit Nunaanniillu inatsisiliortunik naapitsinissamut periarfissaqartinneqarluta. Aamma Islandip aalisarnermut ministeriannik naapitsinera naammagisimaarluarpara, tassuuna nunanut pingasuusunut inuiaqatigiinnut qulequttat tunngasut oqaloqatigiissutiginissaannut periarfissinneqaratta.