Nunat tamalaat aningaaserivissuata Kina akiitsut ilaannik isumakkeerinnissuteqaqquniaraa
Nunat pissakinnerusut aningaasaqarnikkut ajornartorsiutaat annertusiartuinnarnissaat, nunat tamalaat aningaaserivissuata aarleqqutigaa. Akiitsummi ernialersorneqarnerat pissutaalluni akilersuiniarnerit ajornarsigaluttuinnassapput.
Nunat pissakinnerit akiitsui ukioq manna 35 procentinik amerleriarput. Nunat pissakinnerit akilligassaat ukiut tamaasa 441,1 milliardit koruuniupput.
Nuna akiligassaqarfik annerpaaq tassaavoq Kina. Nunat pissakinnerusut akiitsui ataatsimut isigalugit 2/3-iisa missaat Kinamut akliligassaapput.
AAMMA ATUARUK Nalunaarusiaq: Silap pissusia peqqutaalluni 200 millionillit allamut qimaassasut
David Malpass, nunat tamalaat aningaaserivissuata præsidentia New Yorkimi ataatsimeersuarnermi ilaatigut oqarpoq pisut pillugit Kina oqaloqatiginiarlugu, akiitsut ilaasa isumakkeerinnissutigisinnaaneraat aperiniarlugu.
Taamaalisoqanngippat siunissaq nalorninartoqarsinnaassaqisoq taanna oqarpoq.
Malpassip Kinami oqartussat, nunanilu tamalaani suliniaqatigiiffiit sapaatit-akunnerata tulliani ataatsimeeqatigisussaavai.
- Kina akiligassaqarfiit annernut ilaavoq, Kinalu tamanna pillugu aaqqiiniarnermi pingaarutilittut inissisimavoq, nunallu akiitsullit piujuaannartitsineq aallaavigalugu ingerlariaqqissinnaanissaat suleqatigiissutigisariaqarlugu, David Malpass oqarpoq.
