Inuussutissarsiutit

Venture Greenland Lilleholmimut aningaasaliivoq

Aningaasaliisarfik Namminersorlutik Oqartussanit pigineqartoq Greenland Venture Maniitsumi tunisassiorfimmut Lillehom Food-imut manna aningaasaliinialerpoq.

Allattoq Kerté Jeremiassen

decembarip 07-at 2015 14:13

Suliffeqarfik ukiut pingasut ingerlaneranni alliartorsimavoq maannalu 25-inik sulisoqarluni, Lilleholm Food tusagassiuutinut allappoq.

- Tunisassiavut nutaaliat mamartut nerisassallu uunnariaannaat pillugit ilisimaneqalersimavugut, aammalu nutaaliornikkut sulisut niuvertullu akornanni qanittumik suleqateqarluta, Lilleholm erseqqissaavoq.

Aningaasaliiffigineqarnini suliffeqarfiup allineqarnissaanut atorniarpai, siulersuisunilu sulinermi ilisimasaqarnerunermut piginnaanngorsaanermullu atorlugit.

Aamma atuaruk VIDEO Umimmaap neqaanik pølsiliamik hotdogitorsinnaanngorputit

Greenland Venture Lilleholmimut aningaasaliinermigut suliffeqarfiup 40 procentia pigilerpaa.

Aningaasaliisarfimmiit tusagassiuutinut nalunaarummi, Per Buhl Olsen oqarpoq Lilleholm Food niuvertarfiusoq ingerlalluartoq, nunaqarfinnilu illoqarfinnilu pingasuni suliassaqartitsilluni.

- Aningaasaliinitta Lilleholmimi tunisassiorneq, piareersaaneq aqutsinerlu sunniuteqarluarfigissavaa, taamaalillunilu Nunatsinni atuisut tamaasa iluaquserlugit, Peter Buhl Olsen oqarpoq.