VIDEO Umimmaap neqaanik pølsiliamik hotdogitorsinnaanngorputit
- Lilleholm sivisuumik suleqatigilluarsimavarput, Pisiffimmi nioqqutissiornermi pisortaq Johnny Andersen taama oqaluttuarpoq, nangillunilu:
- Suleqatigiippugut nioqqutissanik siuarsaanermi peqataarusuppugullu Lilleholmimiit nioqqutissat saqqummiivissaannik igalaamik, tassani nioqqutissaatitik assigiinngitsut saqqummiunniassammatigit. Lilleholm annertuumik iliuuseqarpoq Kalaallit Nunaata pissarititai nalinginnaanngitsumik siuarsarniarlugit, Johnny Andersen oqarpoq.
Lilleholmip tunisassiai Pisiffimmi nanineqarsinnaapput, nerisassianillu nioqqutissiorfeeqqat Pisiffiup tapersersorai, Pisiffiup tusagassiuutinut nalunaarummi ilaatigut oqaatigaa:
- Pisiffiup suleqatiginera tuppallersimaarutigaarput qujamasuutigalugulu. Detailkædep pitsaasumik suleqatiginera uagutsinnut pingaaruteqarpoq aallartilluarnitsinnut. Uagut nammineerluta tuniniaavissaqanngilagut aammalu allaffissornikkut kikkut tamaasa kiffartuussinnaanagit, Lilleholmip pisortaanera Jens Møller oqarpoq.
Lilleholm Food ApS-ip nioqqutissiorfia Maniitsumiippoq, nioqqutissallu nutaat Pisiffik Maniitsumi nioqqutissaalereerlutik. Nioqqutissat Pisiffiup Ilulissani, Aasianni, Sisimiuni, Nuummi Qaqortumilu pisiniarfiinut aamma agguataarneqarput.