Venstre Konservativellu IA Pituffik pillugu suliami tapersersorpaat

Folketingetimi apeqquteqaat tunngavigalugu oqallinneq Johan Lund Olsenip naammagisimaarpaa. Oqallinnermi Pituffimmut kiffartuussinissamut isumaqatigiissutip annaaneqarnera oqallisigineqarpoq, ilaatigut nunanut allanut ministeri Martin Lidegaard partiillu Kalaallit Nunaat pillugu oqaaseqartartui oqalliseqataapput.
Johan Lund Olsen (IA), Troels Lund Poulsen (V), Per Stig Møller (K). Assi © : IA Folketingimi
Allattoq Camilla Dam
januaarip 21-at 2015 16:20

- Folketingetimi partiit Naalagaaffeqatigiinneq soqutigerpasippaat, apeqqummilu imaattumi amerikamiut sakkutuuvisa Kalaallit Nunaanniinnerannut tunngasumi, siulliullugu Kalaallit Nunaannut pitsaanerpaaq isiginiarneqartussaavoq, Danmarkip immikkut soqutigisai EU-mullu soqutiginnineq siulliunnagit. Aammalu politikikkut Kalaallit Nunaata Danmarkillu akornanni, USA-llu akornanni, isumaqatigiissutit isiginngitsuusaarneqarsinnaanngitsut.

- Siunissamut isiginiarta, neriulluaqaanga, Inuit Ataqatigiit Folketingimi ilaasortaatitaat nalunaarummini allappoq.

Aamma atuaruk Pituffimmi kiffartuussinermut isumaqatigiissuteqarnissaq Folketingetimi amerlasuunit taperserneqarpoq

Johan Lund Olsenilli danskit naalakkersuisuisa Pituffik pillugu suliami qanoq atuuffeqarsimanersut paaserusuppaa, suliallu ingerlanerata arlaannaannulluunniit attuumassuteqanngitsumit misissorneqarnissaa piumasaralugu, tamannalu partiinit amerlasuunit tapersersorneqarpoq.

- Nuannaarutigaara Venstrep Konservativellu ilagalunga suliaq pillugu isumasioqatigiinnermut aggersaammata. Maanna aamma naalagaaffeqatigiinnermut ministeri, tassa ministeriuneq (Helle Thorning-Schmidt, aaqq.) ilanngullugu aggersaavugut, akissutinik ersarissunik pisariaqartitsigatta, Johan Lund Olsenip aalajangersumik oqaatigaa.

Aamma atuaruk Pituffimmi piumasaqaataalersut akisunaarneqarsinnaapput

Greenland Contractorsip Pituffimmut kiffartuussinissamut isumaqatigiissut Exilis Servicesimut amerikamiunit pigineqartumut annaavaa, Exilis Services Vectrusimit pigineqarpoq.